Jaarboek van de Maatschappij der Nederlandse Letterkunde, 1972

4. Verslag aangaande die ‘Maatschappij’ in die Republiek van Suid-Afrika oor die jaar 1971

Die ledetal van die ‘Maatschappij’ bedra tans 52. Die bekende Suid-Afrikaanse klassikus prof. dr. Theodorus Johannes Haarhoff (geb.1892), wat sedert 1949 'n benoemde lid was, het in 1971 die tydige met die ewige verwissel. Prof. dr. G. van Alphen, hoogleraar in Nederlandse Kultuurge-

[p. 296]

skiedenis en direkteur van die Nederlands Cultuurhistorisch Instituut aan die Universiteit van Pretoria het sy voorneme te kenne gegee om, in verband met sy aanstaande aftrede, as lid te bedank.

Nuwe lede is tydens 1971 nie benoem of gekies nie. In verband met die lede van die ‘Maatschappij’ in Suid-Afrika word die volgende besonderhede vermeld: Dr. R.P. Botha, senior-lektor in Algemene Taalwetenskap aan die Universiteit van Stellenbosch is tot professor in Algemene Taalwetenskap bevorder. Aan prof. dr. H.B. Thom, voormalige rektor van bogenoemde universiteit, is die erepenning vir Volksdiens van die Federasie van Afrikaanse Kultuurvereniginge (f.a.k.) oorhandig (11.12.1970).

In Mei 1971 is deur die Suid-Afrikaanse Akademie vir Wetenskap en Kuns aangekondig dat die Stalsprys vir Geskiedenis posthuum aan dr. W.J. de Kock, in lewe hoofredakteur van die Suid-Afrikaanse Biografiese Woordeboek, en die Hertzogprys vir 1971 aan Elizabeth Eybers vir haar digbundel Onderdak toegeken is.

Prof. dr. G.S. Nienaber, voormalige hoof van die departement Afrikaans-Nederlands aan die Universiteit van Natal, is aangewys as voorsitter van die eerste Universiteitsraad van die Universiteit van Durban-Westville. Prof. dr. B. Kok, rektor van die Vrystaatse Universiteit (Bloemfontein) se dienstydperk is, op aanbeveling van die Senaat, deur die Universiteitsraad verleng.

Mnr. L.W. Hiemstra, taalkundige redakteur van die Nasionale Persgroep, Kaapstad, is deur die direksie van die groep gehuldig vir sy vyftig jaar ononderbroke diens by die pers. Prof. dr. G.S. Nienaber is as erelid van die S.A. Akademie verkies, terwyl dr. I.D. du Plessis as eerste kanselier van die Universiteit van Wes-Kaapland (Bellville-Suid) ingehuldig is.

Die Republiekprys ter herdenking aan dr. H.F. Verwoerd is op 31 mei 1971 die eerste keer toegeken en wel aan prof. dr. S.A. Louw, van die departemente Afrikaans-Nederlands en Germaanse Taalkunde, Universiteit van Pretoria. Die toekenning van die prys, wat op grond van prof. dr. Louw se standaardwerk Die Afrikaanse Taalatlas geskied het, word deur die departement Nasionale Opvoeding geadministreer. Die aanbeveling dat die prys aan prof. dr. Louw toegeken word, is deur die S.A. Akademie vir Wetenskap en Kuns gedoen. Prof. dr. Meyer de Villiers, van die Universiteit van Stellenbosch, het vier maande in België deurgebring en aandag aan Vlaamse spellingprobleme gewy. Prof. dr. H.B. Thom het 'n toekenning van die Alexander von Humboldt-Stiftung (Duitsland) ontvang om dié land op 'n studietoer te besoek.

[p. 297]

Op 1 Augustus 1971 was dit 21 jaar gelede dat prof. dr. S.P. Boshoff en 'n tikster die Vaktaalburo (Pretoria) begin het. Mnr. L.W. Hiemstra sal op 22 april 1972 'n eredoktoraat in die Lettere van die Vrystaatse Universiteit (Bloemfontein) ontvang.

Dr. Coenraad Beyers het op 30 Oktober 1971 uit die Argiefdiens getree. 'n Eredoktoraat in die Lettere is deur die Witwatersrandse Universiteit (Johannesburg) aan die digteres Elizabeth Eybers toegeken.

Die dienstydperk van prof. dr. D. Bax, sedert 1.7.1950 hoogleraar in die Nederlandse Kultuurgeskiedenis aan die Universiteit van Kaapstad, is - nadat prof. Bax die aftree-ouderdom bereik het - met 'n jaar verleng. Prof. Bax se wetenskaplike verdienstes is sowel in die Republiek van Suid-Afrika as in Nederland erken. O.m. is in 1967, sowel as in 1970, erepennings aan hom toegeken (S.A. Akademie vir Wetenskap en Kuns, Nederlands-Zuidafrikaanse Vereniging), terwyl hy in 1969 tot Offisier in die Orde van Oranje-Nassau benoem is.

Ten slotte word vermeld dat proff. G.J. Beukes, A.P. Grové en P.J. Nienaber van 1971-1973 raadslede van die S.A. Akademie vir Wetenskap en Kuns sal wees en dat, behalve bogenoemdes, o.m. proff. R.K.E.J. Antonissen, B. Kok en C.J.M. Nienaber gedurende die reeds vermelde tydperk as lede van die fakulteitsraad (Kuns en Geesteswetenskappe) van die Akademie sal dien.

jan ploeger