Der ionghe dochters tijt-cortinghe

[fol. 2r]

Allen eerbaren ende devchdeliicken ionghe dochteren, vvensch ick hier mede alle vvel-vaert ende voorspoet.

MEN seyt voor een ghemeyn spreeck-woort. Ionstighe vriendinnen, dat hy hem saecht spieghelt, die hem aen anderen spieghelt, tis wel waer dat het spreeck-woort oock seyt, dat d'experientie best leert, dat oock harde smaken wel leeren, maer soodanighe tedere ende lieflijcke persoonen als ghylieden zijt en behoortmen met gheen herdicheyt dan alleen met vriendelijcheyt ende lieflijcheyt te beieghenen, op dat ghy met soeticheyt moecht verstaen wat bedroch datter inder werelt om gaet, ende v daer voor leert wachten, daerom heb ick alhier by den anderen versaemt verscheyden exempelen, so hier ende daer in verscheyden landen gheschiet ende ghebeurt, daer in ghy sult moghen sien hoe dat de ghene die haer herten so seere laten wortelen inde wereltsche tijtlijcke ende sotte minne, alle liest ende bedroch doruen soecken ende hanteren om ten eynde van haerder begheerten te comen, stellende alle eerbaerheyt aen d'een syde, niet achtende de vrientschap van hare beste vrienden, hoe wel sy meest

[fol. 2v]

tot het eynde van haerder begheerten niet en connen comen, sulcx datse dicwils haren gheheelen tijt ouerbrenghen in treuren, droefheyt ende ghequel, doen haer seluen ende anderen groot verdriet ende lijden aen, andere comen wel tot haer voornemen maer de fortuyne haer ongestadige Radt omdraeyende, brengtse (als sy meenen al na haren wille te hebben) daer naer in een ure in meerder verdriets, dan sy vreuchts hebben ghehadt in thien Iaer, soo datse ghenieten,

Voor een pinte VVijns,
Thien stoopen Asijns.

Van dese ende meer andere saken vint ghy hier vele schoone exempelen ende gheschiedenissen, daer wt ghy moecht leeren v seluen van soodanighe daden wachten, want ghy sult hier in ooc beuinden, dat de ghene die wt zijn om anderen te bedrieghen, selfs int eynde bedroghen werden, ende datse inde stricken daer sy anderen in meynen te vangen selfs meest werden gheuanghen, daerom neemt dese moeyten v ten goeden ghedaen, in dancke vanden ghenen die v hier naer siende dat v dit aenghenaem is, noch meerder dienst hoopt te bewijsen, met vele andere schoone vertellinghen. Vaert vvel.