Het hofken der geestelycker liedekens

[Wy Ionghe sinnen]

Een geestelyck Liedeken op die wyse, Den tyt es hier.

Wy Ionghe sinnen
Comen om druck te verwinnen
Met groot iolijt
In desen soeten tijt
Wilt doch sonder nijt
Ons ionghe bende aensien
Sijt ons doch ionstich
Al en sijn wij niet seer constich
En wilt niet benyen
Ons simpel cleyn ingien.

Maer wilt v verblijden
Stelt allen druck besijden
Verblijdt v sonder quaet
Schout gulsich ouerdaet
Laet varen Martis saet
En Venus ombestier

[p. clxxv]

 

En laet v ionghe sinnen

 

Van Bacchus niet verwinnen

 

Weest ghemaniert

 

Als ghij blijschap hantiert

 

 

 

Maer wilt aenschouwen

 

Wat dronckenschap can brouwen

 

Wat dat Noe

 

En Lodt sijn dochter de

 

En Alexander me

 

Versloech sijn vrindt minoot

 

Absolon vermoorde

 

Syn broeder wijt oyt hoorde

 

En Holofernes groot

 

Wert van Iudith gedoot.

 

 

 

Wilt niet gelijcken

 

Den ouerdadighen rijcken

 

Soo ons Lucas schrijft

 

Dies wel indachtich blijft

 

Die Lazarum verstijft

 

Sijn spijse niet en boot

 

Maer wilt ontfermen

 

Den hongerigen ermen

 

Breckt hem v broot

 

Laeft hem in sijnen noot.

 

 

 

Het woort der propheten

 

En moochdi niet vergeten

 

Wee v lieder quaet

 

Die smorghens vroech opstaet

 

Om te wesen versaet

 

In dronckenschap versmoort

[p. clxxiiij]

 

Om droncken te sijne

 

Te berren vanden wijne

 

En ligghen verstoort

 

In gulsicheyt versmoort.

 

 

 

In v maeltijden

 

Hoort den propheet belijden

 

Hoortmen gheschien

 

Sanc ende melodyen

 

Herpen om verblijden

 

En trommelen ghecrijt

 

Wijn en lecker brocken

 

Sietmen v lieden slocken

 

Maer in corter tijt

 

Ghij rasch ter hellen sijt.

 

 

 

Prince wilt ghedincken

 

Wacht v van droncken drincken

 

Hout maete altijt

 

In deuchden sober sijt

 

Laet varen alle spijt

 

En al op dit termijn

 

Wilt vreucht vermeeren

 

Schout dronckenschaps vseren

 

Op dit termijn

 

Met ons wilt vrolijck sijn.