Het hofken der geestelycker liedekens
(1577)–Anoniem Hofken der geestelycker liedekens, Het–
Auteursrechtvrij
[pagina clxx]
| |
Hier om soo wilt v spoyen
Die werelt te verfoyen
Ick leert v als die wijse doet
Wat batet al als ick steruen moet.
Steruen so moeten wij arm en rijcke
Wat willen wij ons vermeten dan
Die pijne der hellen sal dueren eewelijcke
Hij is wijs diet bevroeden can
Want dansen ende springhen
Het sijn al verganckelijcke dinghen
Die doot neemt ons het leuen soet.
Wat batet.
Bereyt v huys in corter stonden
Of die doot sal v den wech ondergaen
Och wee den ghenen die dan steruen in sonden
Die sullen dan loon nae haer wercken ontfaen
Als die ooghen sullen keeren
Ende therte v sal faelgeren
Waer blijft dan tgeselschap en daertsche goet
Wat batet al als ick steruen moet.
Alsijt ghij beswaert met fantasien
Al sidi nv bevreest al voor die doot
Wilt ghij voordaen nv vromelijck strijen
Godt sal v helpen wt alder noot:
Aldus leert die werelt haten
Ende wilt die sonden laeten
Die doot cost ons doch vlees en bloet.
Wat.
Adieu prieel vol alder wellusten
Bedriechelijcke werelt een cort solaes,
Ick wil in Godt gaen soecken mijn ruste
Ick moet doch eens worden der wormen aes
| |
[pagina clxxi]
| |
Wat salt mij profiteren
Houeren ende bancketeren
Als die doot compt snel ende onbehoet, wat batet.
Waer sijnse die pleghen te triumpheren
Sy sijn ghepasseert men sietse nv niet
Wat willen wij dan ghenoechte hanteren
Alst eynde niet en is dan verdriet
Dus laet ons gaen beginnen
Ons seluen te verwinnen
Want de doot compt rasch op den staende voet
Wat
Laet ons nv princelijck leeren steruen
Beschreydende met tranen ons misdaet,
Ende vreesen den Heere wij en sullen niet bederuen
Ende dienen Godt elck in sijnen staet,
Want waer wij ons keeren
Scriftuere sal ons leeren
Dat teghen die doot en is schilt noch boet.
Wat.
|
|
