Het hofken der geestelycker liedekens

[p. lxvi]

[Ghij mannen ende vrouwen]

Dit liedeken is vanden soeten naem van onser Lieuer Vrouwen Maria, ende gaet op die wyse, Met vreuchden willen wy singhen.

Ghij mannen ende vrouwen,
Die op de werelt sijt
Wildy v siele behouwen
Ende beteren uwen tijt
Wildy den vijant mincken
Die ons altijt volcht nae
Hebt in v ghedincken
Den name van Maria.

Maria is soo soete
Ende soo wel ghenaemt
Datse die Enghelen groeten
Alsoot haer wel betaemt
Het is die Coninghinne
Die Godt sijn bootschap sant
Vol gratien ende vol minne
Maria is sij ghenaemt.

Des heylighen Kersnachte
Woude hij gheboren sijn
Van haer die ons brachte
Die hemelsche doctrijn
Sonder wee oft smerte
In maechdelycker vreucht
Nv louen wij met herten
Maria die suyuer ieucht.

Bij des Enghels saluyten
Datse Iesum ontfinck
Wert de vyant te buyten
Van ons die ons bevinck,
Het sant hem Godt die Vader
Al in Marien lijf

[p. lxvij]

 

Wy dancken alle gader

 

Marien dat reyne wijf.

 

 

 

Die neghen Engelen chooren

 

Die salighe Seraphijn

 

Altoos sonder verhooren

 

Louen met herten fijn

 

Die soete suyuer naem

 

Die elck met herten dinckt

 

Die Gode wel es bequaem

 

Maria des menschen vrint.

 

 

 

Maria is die vlamme

 

Diet Paradijs verlicht

 

Maria sonder blame

 

Vol gratien is gesticht

 

Sij is die Tresorije

 

Van gratien dat is certeijn

 

Met loue willen wij vercieren

 

Mariam alle ghemeyn.

 

 

 

Soo wie dat in dit leuen

 

Mariam eere doet,

 

Sij en sal hem niet begheuen

 

Al eest dat hij misdoet

 

Gratie sal hij vercrijghen

 

Als dede Teophilus

 

Hij en wildet loff niet swijghen

 

Maria die moeder Iesus.

 

 

 

Die kan Mariam eeren

 

Ende dienen met herten gheheel

 

Sij sal hem impetreren

 

Van gratien sulck ghedeel

[p. lxviij]

 

Dat hij niet en sal moghen

 

Verdoempt sijn na sijn doot

 

Nv laet ons allen louen

 

Mariam wij hebbens noot.

 

 

 

Maria draecht die croone

 

Naest Iesus haer lieue kint

 

Sij salt hem waerlijc loonen

 

Diese met herten mint

 

Nv bidden wij alle gemeyne

 

Marien die suyuer ieucht

 

Dat sij ons verleene

 

Haer gratie en haer deucht.