Het hofken der geestelycker liedekens

[Ontwaect nv Israel doet op v ooren]

Ontwaect nv Israel doet op v ooren
Wilt hooren naerder Propheten stem
Die ons langen tijt was belooft te voren
Die is nv gheboren in Bethleem
Soo ons die scriftuere tuycht van hem
Soo sal hij wesen ons middelaer
Wilt vreuchde bedrijuen mannen ende wijuen
Al in dat soete nieuwe iaer.

Een sterre wt Iacob is op geresen
Soo ons Balam heeft ghepropheteert
Abrahams belofte is gheschiet door desen
Ons salichmaker is ghedescendeert
Den dach die Simon heeft begheert

[p. xxxi]

 

Die is nv ghecomen noyt blijder maer

 

Wilt vreuchde rapen ghij Christen schapen

 

Al in dat soete nieuwe iaer.

 

 

 

Den bant van Adam is nv ghebroken

 

Vrede wort vercondicht ouer al aertrijck

 

Daer ons Ioannes af heeft ghesproken

 

Is nv ghecomen tot allen tijt

 

Wt liefde gheworden mensche ons ghelijck

 

Om ons te verlossen alle gaer

 

Wilt hem aencleuen om zijn woort te beleuen

 

Al in dat soete nieuwe iaer.

 

 

 

Ierusalem wilt v verblijden

 

Ghij dochter van Syon laet droefheyt staen

 

Ons salichmaker is nv in tijden

 

Gheboren naeder scriftueren vermaen

 

Die herderkens hebben die bootschap ontfaen

 

Dat licht schijnt in die werelt claer

 

Willet hem aenbeden met vrolicheden

 

Al in dat soete nieuwe iaer.

 

 

 

Ghij heydenen wilt nv ontwaken

 

Want dat woort is vleesch geworden rechte voort

 

Ende wilt den ouden Adam versaken

 

Want dat woort is Godt, ende Godt is dat woort

 

Door hem gheheel comt ons confoort

 

Door niemant anders alsoo voorwaer

 

Wilt hem aencleuen om zijn woort te beleuen

 

Al in dat soete nieuwe iaer.

 

 

 

Prince der Acoleyen dat is v gheschoncken

 

Al van die broeders liefde is tfundament

 

Nv laet Gods woort in v herte voncken

[p. xxxij]

 

Twelck vanden Vader is neder ghesent

 

Ghecomen wt der hemelen tent

 

Om ons te verlossen alle ghaer

 

Dus wilt hem louen die daer was verschouen

 

Al in dat soete nieuwe iaer.