Het hofken der geestelycker liedekens

[Waer is die dochter van Syon]

Dit gaet op Puer nobis nascitur.

Waer is die dochter van Syon
Ic soudese so blijde maken
Ic soude haer een bootschap doen
Van alsoo grooten saken.

Doen men al di werelt bescreef
Doen ginck die maghet sware
Te Bethleem daer sij doen bleef
Ende ontfinck haer kint aldaere.

Een ghelas al schijnter door
Ten breckt niet vander sonnen
Dus heeft die maghet nae en voor
Ioncfrou een kint ghewonnen.

Een duysternis is ons verclaert
Een licht is ons verresen
Een maget heeft een kint ghebaert
Dat dunckt mij wonder wesen.

Nv is hij teeder ende cranck
Een maghet sal hem voeden
Wij moghen hem alse wel weten danck
Van sijnder grooter aermoeden.

Hij thoont zijn goedertierenheyt
Wijlen was hij verbolghen
Hij drijft soo groote ootmoedicheyt

[p. xij]

 

Wij en connen hem niet gheuolghen.

 

 

 

Maria nam hem op haren schoot

 

Sij custen aen sijnen monde

 

Die minne die hadde sij alsoo groot

 

Tot hem in allen stonden.

 

 

 

O Heere loff moet v altoos zijn

 

Wilt ons altijt gheleyden

 

Met die waerde moeder dijn

 

Als wij alle van hier scheyden.