Het hofken der geestelycker liedekens(1577)–Anoniem Hofken der geestelycker liedekens, Het– Auteursrechtvrij Vorige Volgende [Doen Iesus gheboren wert] Op de wyse. Tis huyden een dach van vro. Doen Iesus gheboren wert Tot Bethleem inder steden Doen rees daer op al metter vaert Een schoon sterre, waer mede Drie Coninghen worden daer ontwaer Dat die sterre scheen alsoo claer Sij seyden oock ghelijcke Den Ioden is een Coninck gheboren Ons bidden en is niet al verloren Wie soecken hem al in dat Iootsche rijcke. Die coninghen scheyden doen van daer Sij en wouden niet langher beyden Die sterre scheen voor hen soo claer Sij woude hen rechte leyden Sij was lichter dan den dach [pagina vi] [p. vi] Sij hielden altijt den rechten padt Haren ganck was bijder aerden Haer weghen waren alsoo menichfout Onse Godt hadde die sterre bout Tot die Ioden dat sij keerden. Tot Ierusalem dat sij quamen Die sterre bleef verloren Sij vraechden weet daer niemant van Waer is dat kint geboren Een teecken hebben wij gesien Wij hebben sijn sterre gesien Alsoo verre in Oostenrijcke Het en can ons niet ontgaen Wij willen hem beden aen Wij drie oock alle ghelijcke. Doen Herodes dat vernam Sijnen ancxt en was niet cleyne Hij wert in sijnen sinnen gram Ende alle die stadt gemeyne Hij liet halen die oudtste meesteren Ende daer toe die wyse priesteren Die waren wtuercoren Ghij heeren een dinck heb ick gehoort Dat sult ghy my maken vroet Waer is dit kint gheboren. Sy seyden alle dat is waer Te Bethleem ist gheboren Dat sprack een Propheet claer Soo menich iaer te voren Doen Herodes hadde vernomen [pagina vij] [p. vij] Die drie Coningen liet hij voor hem comen Hij vraechde hen heymelijcke Ghij heeren hoe sal ick dat verstaen Waer saecht ghij die sterre opgaen In uwen Conincrijcke. Die Heeren dachten daer geen quaet Sij dedent hem openbaren Herodes sprack ick geue v raet Te Bethleem sult ghy varen Dat kint suldy vinden daer Dat seg ick al openbaer Dat heb ick soo vernomen Als ghij weet waer dat is Soo maket mij dees dingen wijs Als ghij weder comet. Soo willen wy comen als wij eerst mogen Ende doen hem groote eere Dat kint willen wy bidden aen Voor eenen rechten lants heere Die Coningen scheyden daer van daen Die sterre scheen voor hen soo claer Ende die sterre woudese rechte leyden Die sterre scheen voor hen soo claer Alsoo lange als sy bleef staen Daer Maria ende Ioseph waren. Sij traden in dat huys alle drie Daer toe en was hem niet leede Sij vonden dat kint schoon en claer Maria ende Ioseph mede Ende sy vielen op haer beyder knien [pagina viij] [p. viij] Sij baden aen dat kindeken alle drie Met hertelijcker minnen Sij loken op haer schat was bout Sij offerden myrre, wieroock, ende gout Met alsoo hertelijcker minnen. Des nachts ontrent der middernacht Doen quam in haeren droom Sij en souden tot Ierusalem niet keeren Ende niet tot Herodes comen Ende sij waren doen alsoo wel ghetroost Sij waren van Herodes verlost Sij en wouden niet weder tot hem comen Sij waren doen alsoo wel ghemoet Sij kosen een ander wech was goet Nae haren conincrijcke. Amen. Vorige Volgende
Auteursrechtvrij Auteursrechtvrij Auteursrechtvrij
Auteursrechtvrij
Auteursrechtvrij