De historia van den souen wysen meisteren

Hijr steyt allexander vor dem koninge van egipten vnde secht em van den rauen de em na vloghen.

DE knape sprack. here ik wil id iw seggende Id geschach in enem durren iare, dat de olden twe den drudden den iungen hadden. vnde do se nicht van durheyt vnde vnvruchtbarheit den iungen generen mochten, do vloch de moder van

[fol. 32r]

em, vnde de vader blef by em, vnde hadde groten hunger vnde kummer, dat he den iungen generde. Do nu de dure iaer vergynghen. do quam de moder wedder, vnde meende se wolde des kyndes zelschop ghetrostet werden. dat duchte dem vader vnde iungen vnbillich, vnde spreeken gy hebben dat ordel vor iuw ghetogen. Nu gheuet een recht ordel, so sy gy des seker dat gy se nummer en seen. De konynck gynk vor een vynster. vnde de olden weren dar myt groten geschrye. Do sprack de konyngk. Dat wyff schal nycht gevrouwet weerden des kyndes selschop. wente in des kyndes noet scheydede se van em. De rauen vloghen enwech, vnde worden nummer meer gheseen, De konynck nam den iungelinck alexander to em vnde sprak. Nenen vader schaltu meer hebben dan my Wen du wult, so wyl ick dy myne dochter gheuen.