Historie vanden vier heemskinderen

[fol. 8]

Dat derde capittel. Hoe coninc Karel sende drie ambassaten tot Aymijn van Dordoen. om pays met hem te maken van der doot van heer Hughe sijn neue. Ende hoe dat dese pays worde gemaect ende qualic gehouden ende seer corts gebroken.

Aldus dit oerloge geduerde seer lange nochtans wast ten laetsten den genoten van Vrancrijc sware te liden ende verdrietelic, want als Aymijn woude, mosten si striden ende si overdroghen des ende gingen te rade met malcander dat si den coninc bidden wouden dat hi vrede makede tegen Aymijn ende sijn volc. Als si aldaer met malcander gesloten hadden sijnse gecomen daer si coninc Karel vonden. ende hebben hem ghegruet met reverencien. Ende als si hem groete eerwaerdicheit ghedaen hebben seiden si: ‘Here coninc, u is condich hoe dat dit oerloge lange gestaen heeft tusschen u ende Aymijn van Dordoen. Wij bidden u dat ghi vrede met hem maken wilt. want

[fol. 9]

alle tlant daer of beschadicht ende gescent wort.’ Als coninc Karel die woerden ende begeerten van sijn heren gehoert. ende overghemerct hadde, verdroech hij[t] seer swaerlic; nochtans in hem selven over leggende dattet de genoten hem alle baden soe consenteerde hijt dat hijt doen woude wes hem luiden daer goet in dochte. Daer tracteerde ende overdroghen die genoten dat coninc Karel scriven soude een minlike gruet ende enen brief ane Aymijn ende sijn maghen. als dat hi hem die misdaet beteren woude die hi teghens hem ende sijn vrienden mesdaen hadde, twelc terstont also gedaen was. Daer sende coninc Karel drie ambassaten met enen brief tot Aymijn die doe tot Pierlepont lach, inhoudende dat hem heer Huge sinen neve den doden opwegen woude met gout negen werven. ende op dat hi dair mede sijn pays ende vrientscap mocht vercrigen. Als Aymijn desen brief had gelesen doe hads hem onmare ende seide met toernigen moede totten drie ambassaten: ‘Segt Karel den coninc dat ic dit oerloghe noch veel liever houde dan ic sulken soene an nam over minen neve.’ Dese drie ambassaten sijn wederom gekeert ende hebben dese woerden den coninc gheseyt. Doen senden coninc Karel weder met een brief tot Aymijn inhoudende dat hi den doot vergeven woude van sinen neve, hi woude hem geven sijn suster vrou Aye tot enen wive ende alle sijn goet dat hi hem of sijn vrienden genomen had. Als Aymijn desen brief over gelesen had die hem coninc Karel ghesent hadde heeft hy den drie ambassaten gehieten dat si toeven souden: hi soude hem met sinen vrienden beraden. Aldus heeft Aymijn sijn vrienden bi hem doen comen, als Amerijn van Nerboen, Willem van Oringen. ende menich ander edel baroen. ende seide hem luiden den boetscap

[fol. 10]

ende badt hem allen dat si hem wouden helpen raden wat hier best in gedaen waer ende hem alle goet dochte. Daer seiden si alle: woude coninc Karel hem alle houden. ende doen tgoet dat hi hem gescreven ende ontboden hadde, si waren des goetwillich te doen. Dair sende Aymijn enen brief ane coninck Karel bi Alaert ende Maeldegijs sijn neven, inhoudende. waert dat hy hem sijn suster geven wilde tot eenen wive. ende voert onderhouden dat tractaet also hi bi sinen brieven hem ontboden hadde, hi waer te vreden de pays an te gaen, met veel ander woerden de inden brief gescreven stonden die te lanc waren te scriven. Ende Alaert ende Maeldegijs quamen tot Parijs gingen si totten coninc ende deden hem reverencie. Dat gedaen sijnde gaven si hem den brief inde hant ende seiden dat hi hem daer af een antwoert soude doen hebben want die pays en mocht niet gemaect worden noch den doot gesoent van haren neve ten ware dat hi dede na tinhouden van den brieve.

Doe coninc Karel den brief ontfangen hadde dede hi den brief voer alle sijn magen ende baroenen lesen. Ende als si alle dat inhouden van den brief gehoert hadden ende wel verstaen die opinie ende meninge van Aymijn ende sinen magen so waren si alle seer blijde. ende hieten den coninc dat hijt al volquame. ende hem des terstont een antwoirt ontboden, twelc coninc Karel gairne dede. Daer wort ontboden voer den coninc Alaert ende Maeldegijs. Ende doe si voer coninc Karel quamen seide hi tot hem dat si togen ende seiden Aymijn dat hi quame te Senlis om aldaer een vast tractaet vander soenen te maken: ‘want ic en wil niet langer oerloge teghen hem voeren.’ Met desen antwoerde togen si weder tot Pierlepont. ende hebben Aymijn geseit des conincs meninge ende als hijt mit sijn vrienden verstaen

[fol. 11]

heeft, sijn si blide geweest ende hebben hem alle bereit om te Senlis te trecken, elck als hi cierlicste. ende eerlicste mochte met alle haer macht. Ende als coninc Karel verhoerd dat Aymijn ende zyn magen bi Senlis quamen, is hem te gemoet getogen met zyn magen ende menigen edelen man met vrouwen ende ioncfrouwen ende dede sine tente slaen in een scoen pleyn. daer men den pays maken soude ende is Aymijn een stuc tegen gegaen met.V. hondert ridders wullen. ende barvoet ende voer Aymijns voeten gevallen seggende: ‘Ic heb misdaen. ic bid dat gi mi vergeeft den doot van uwen neve. om Gods willen, ic wils u ende uwe magen beteren wes ic vermach.’