Historie vanden vier heemskinderen

Historie vanden vier heemskinderen

Dit is de historie vanden vier heems kinderen. Ende gsciede bi. Coninc karels tiden die grote Die hadde genoet alle die heren van Kerstenrijc tot sijnre worscap. Alsoe als die histori vertelt. Ende is seer ghenoechlijc om lesen.

[fol. 1]

int eerste capittel wort verclaert hoe die grote coninc Karel een groete feeste maecte dair genoet waren alle die eedelste van Kerstenrijc ende hoe die feeste met groeter droefheit eynde.

Also als wi vinden bescreven in ouden yeesten so hadden die keyseren coningen ende ander grote heren ende prelaten een gewoent onder hem. als datten si eens des iaers feest hilden met groter triumphen ende vrolicheit. Dese gewoente hadde die edele coninc Karel die grote keiser van Romen ende coninc van Vrancrijc. Also dat hi alle iaer met groter glorien feest plach te houden binnen die stede van Parijs ende daer worden ontboden ende genoet al die edelste van der werelt van Vrancrijc ende van alle coninc Karels lande ende elc na sijnder wairden. Nu te comen tot onser materie, so was coninc Karel houdende een seer rijclic costelijc hof nader gewoente in gedachtenisse dat hi coninc gecoren was van Vrancrijc. ende gecroent so dat dair gecomen waren tot sijnder eren ende wairdicheit ende om zijn glorie te vermeren die edelste ende wtgenoemste van al Kerstenrijc geestelic ende waerlic. Inden eersten onsen aertscen vader die paeus van Romen, die patriarche van Ierusalem die cardinalen bisscopen legaten. ende veel groter geesteliker prelaten. Ende xij gecroende coningen.xxij. hertoghen. thien hondert ridders vijf dusent ionckers ende sciltknechten wel geboren ende vroem ter wapen in oerlogen in ternoyen. ende daer waren veel scoender vrouwen, ende ioncfrouwen alle van hoge edel geslachte seer costelic ende cierlic toe gemaect mit menigerande abiten gulden laken flueel side ende ander menigerleie vreemde coloren die suverlic waren. Ende voert van anderen volcke waren daer grote menichte sonder

[fol. 2]

getal. Want dese grote feest was Dinxdaechs na Pinxter in scoenste ende genoechlicste vanden iare. Ende so wes datmen tot die feeste behoeven mochte was daer overvloedich meer danmen conde gedencken, alsoe dat daer niet gebrac wat vroechde of solaes maken mochte. want elc was geseten ter tafelen na sijnder waerden ende tuschen elcke twee ridders sat een scone ioncfrouwe dat seer genoechlic was om sien; dair diende ter tafelen menich edel ende wel gheboertige mannen ende elc diende seer begeerlijc ende met groter naersten om dat daer niet gebreken en soude van spijs of dranc.

Aldus sat coninc Karel keyser van Romen met sijnder cronen in groter triumphe ende vromicheyt. Ende besiden hem was geseten die vrouwe sijn keyserinne. Ende in die sale sat tot eender tafelen mijn heer Aymyn grave van Dordoen ende Amerijn van Nerboen; daer was heer Huge van Dordoen. ende was een suster soen van Aymyn ende was een schoon man mit geluen hare ende seer wel ter spraken. Dese heer Huge stont op vander tafel daer hi sat ende ginc voer conincs tafel daer hij sat met sijnder keyserinnen. in groten triumphen ende glorien. Ende als hi voer de tafel stont is hi oetmoedelijc ter aerden over sijn knyen. gruetende coninc Karel seer soetelic ende sijnder vrouwen der keyserinne ende alle die baroenen ende edelinghen dye daer geseten waren. ende heeft gheseit tot coninck Karel met soeten hovesschen woerden: ‘Heer coninc ende keiser van Romen, u is wel condich hoe dat hier te hants mede inder salen sijn mijn twe omen. Die een is gheheten Aymijn van Nerboen ende hebben u trouwelicken ghedient in Turkien als goede capiteinen haren

[fol. 3]

heer sculdich zyn te dienen menigen tijt, ende menigen heiden hebben si verslegen ende hebben in menich groet perikel om uwen wille geweest dat si willich ende gaerne gedaen hebben. Dair om edele here coninc Karel, u is wel kondich dat gi nye hen luyden so veel en gavet dat si een paer sporen copen mochten. Aldus edel here coninc Karel, hebben si mi an u ghesent an u begerende vriendelick dat ghijse verghiften wilt eerlic dair si hogelic ende eerlic haren staet op mogen voeren.’

Als coninc Karel dese woerden gehoert hadde. so sprac hi tot heer Hugen mit een toernigen moede ende seide: ‘Ghi eyschet te vergheefs voer hem luden want si hebben mi menige reise geeyschet ende ic en heb hen nye met willen geven noch ic en sal hen niet gheven, si doen daer toe dat si mogen.’ Als here Huge den mogenden coninc Karel dese woerden hoerde spreken, wert hi seer ontset van binnen ende sprack met hovaerdiger talen. seggende hem: ‘Here coninc, en wildi mijn oemen niet beghiften die u so langhe tijt eerlic ende ridderlic gedient hebben, men sals u groten lachter ende scande spreken in ander heren hove ende u goede eerlike fame die ghi hebt sal daer bi vergaen ende wtgedaen worden, twelc u oneerlic wesen sel.’ Als coninc Karel dese hoemoedige woerden gehoert hadde van heer Hugen so wert hi met toerne seer ontsteken ende toech met haesten een swaert. ende sloech heer Hugen den eedelen man dat hi doot viel ter aerden voer coninc Karels tafel, dat de vloer vander salen seer nat was van sinen bloede. Ende daer wort een groot geruft. ende gecrijsch onder de edelen daer grote oerloge of quam.