Herbarijs
(1965)–Anoniem Herbarijs–[197]VErbena dat yserne. Ende gesoden in wine doet wel orine maken Of gestampt ende optie blase geleit. ende helpt breken den steen ¶ Ende si es goet ter ziecheit vander siden. vander leveren ende van der borst. ende helpt den genen die siin tisike ende ter geelsucht enten zeren ogen. op dat men haer sop geeft te drinkene met warmen watere ¶ Tsap vander yseren gehouden in den mont geneest dat montevel entie wonden van den monde ende suvertene van alder vortheit ¶ Ende yserne gestampt ende geleit op ene versche wonde geneestse. Ende gedronken met warmen watere tsap vore den acces van derden dach corts geneest ende van .4. den dach corts. Ende gestoten yserne ende gebonden opten puls vore den acces van den corts helpt zere | |
[pagina 484]
| |
[198]URtica dats die netele Si es heet in den .3. graet Ende gestampt ende geplastert op dier liescen porte dats wlva ende optie lendenen geeft macht ter luxurien ende doet wel orine maken ¶ Ende si es goet jegen tcoude fledercijn. ende iegen lede die teslapen siin. ende jegen die jucht. ende iegen dlanc evel eist dat mense stampt ende daer op leit. ende dat mense drinct. Ende si verlicht verscen lichame ende stopt drogen. Si suvert die borst van tayer fleumen. ende geneest den dagelijxen rede. Ende es goet jegen twitte water ende iegen die geelsucht ¶ Netelen gestampt ende tsap gewrongen in versscen wonden droechse ende geneestse. Ende tsap geminct met wit van eye stopt bloet van wanen dat comt op dat ment daer op leit ¶ Echter tsap gehouden in den mont droget ende geneest den huuf die van groeter versscheit comt ¶ Olye van oliven daer netelen in gesoden siin doet wel sweeten eist dat men den lichame daer met salft. Ende netelen gestampt ende optie spenen geleit geneestse | |
[pagina 485]
| |
[199]UVa dat siin wijnbesien ende siin van .2. manieren. den zuer ende dander soete. Die zure of die groene die siin cout Entie ripe of die soete. die siin heet Ende maken goet bloet. ende voeden bat dan figen ¶ Ende vanden zuren maect men verguus. ende dat maect goeden appetijt | |
[pagina 486]
| |
[200]Zizania of doleke die wast int coren ende meest in verscen tiden. Ende heeft ene sterke cracht van venine. ende bedroeft somtijt den sin alse of een dronken wa\re | |
[pagina 487]
| |
¶ Ende geminct met gerstenen mele ende met mirren ende met wyeroke ende met soffrane. ende dit jnt vier geworpen. ende dien rooc ontfaen in wlva. Opent die adren. ende doet menstrua hebben ¶ Ende groene getempert met aysine eist goet jegen zeter ¶ Ende gesoden in wine suvert vule apostemen ende vule wonden. ende heiltse daer naer Explicit |
|