Logo DBNL
Herbarijs (1965)

Herbarijs

(1965)–Anoniem Herbarijs–rechtenstatus Auteursrechtelijk beschermd

Vorige Volgende

¶ Mirtus. Malva. Millefolium. Millum solis. Mandragora. Mercuriael. Mirtus Mellilotum. Melanconia. Mala maciana. Mora domestica. Mispelen

[113]

MIrtus es coud in den iersten graet ende droge in den andren. Entie roke van mirtus vecht iegen die heete dome die int hoeft slaen. Ende es goet den genen die vele sweeten entie vele ziecheiden hebben daer met gesmeert den lichame. doet de gaten sluten vander huut. ende verbiedt sweeten

[114]

MAluwe. of pappele. es cout in den .2. graet. ende wac in den iersten. Entie enen swere heeft. salmen stoten die blade met verscen swinen smoute gewarmt op ene tiechle. ende leggent daerop ¶ Ende dit selve plaester es goet opten coeke ende jegen verhertheit van leveren ende van melten ja daer op geleit ¶ Warmoes van maluwen licht den lichame die te hart es ¶ Maluwe geneest gescorde darmen ende ontstopt orine die bestopt es. ende brect den steen op dat mense drinct met wine ¶ Ende om wel te slapene. salmen malue sieden in watere. enten zieken been ende voeten daer in stoven. hi salre met comen an sinen slaep. Ende op wijfs borsten geleit geneestse. ende heete sweren

[115]

Mille folium. es heet ende droge in den .2. graet. ende heilt wonden. ende es goet in wonden dranke. Ende stremmet bloet ten nese ¶ Ende op spenen geleit die leken van bloede geneestse

[116]

Milium solis. dats gremil. ende es heet ende droge in den .3. graet. Ende es goet iegen die coude niere. Ende het breect den steen

[117]

Mandragora siin wortelen van cruden. ende siin tweerande. ende wast als man ende wijf. Ende dat mannekijn heeft bladere alse beetcolen. ende dwijfkiin alse latuwe. Ende diet uter erden trect hi moest sterven. Ende daert steet siet men bi nachte groet licht. Ende dmannekijn helpt den man. ende dwijfkijn den wive. ¶ Ende thoeft van den mannekine es goet jegen hoeftswere. Entie ogen siin goet iegen die ogen. Ende also voort elc led vanden mannekine jegen elc led van man al toten voeten toe. Ende also vanden wijfkine jegen dwijf ¶ Ende wiltu dat .1. wijf een cnechtkiin drage So gef hare drinken tsap van den mannekine. Ende wiltu ene dochter hebben gef hare van den wijfkine ¶ Ende die tsap drinct van den mannekine. hi leecht als

of hi doot ware. Ende als die surgine willen werken. so doense den lieden hier met liggen als of si doot waren. Also dat si niet en weten wat dat men hen doet. Ende alsise willen doen waken. so nemen si tsap van ruten. aysiin ende genciane ende mingent over een. ende doent hen lopen in die oren. ende dan ontwaken si ¶ Mandragora es oec .1. boem. Entie scorssen siin cout ende droge. ende doet tselve dat tforste mandragora doet

[118]

Mercuriael es cout ende wac in den .3. graet. Ende men gevet tsap te drinkene dien die den terciaen hebben. om te purgeerne colera ¶ Ende diet ziedt met vleesche ende dan eet. maect den lichame moru

[119]

Mirtus of mirta dats gagel. ende es cout in den iersten graet ende droge in den .2. Ende .2. jaer machment goet houden. Ende tsap es goet in cyropen

[120]

MEllilotum. dats millilote ende es heet ende droge in den iersten graet. Ende dit cruut wast opt velt. ende riect wel alst bloyt. Ende dit cruut doet men in medicinen. Ende tsap gedaen in spisen doet de spise wel rieken

[121]

MElanconia of coctava of codappel siin cout ende droge. ende men hancse op met draden ¶ Ende die vercranct es van hitten salmen geven tetene van desen applen rou ende gesoden

[122]

MAla maciana. of hout applen of apple siin cout ende droge. daer omme siin si goet jegen walginge. Entie sute apple maken wint. Ende die zure sal men den zieken braden

[123]

MOra domestica. dat siin moerbesien. Ende siin goet iegen den huuf Dyamorum dats dat men maect van moerbesyen ¶ Ende tsap vander wortelen des boems geminct met zeeme dat dodet die worme die siin in die mage op dat ment nut

[124]

Mispelen siin cout ende droge in den andren graet. ende beletten walginge. Ende siin beter geten na de spise dan nuchteren. want na datmen geten heeft so conforteren si


Vorige Volgende