Handschrift Berlijn mgo 185


[lied 11]
dit is die wy Myn hertken wtuercaeren haet du biste mych lief ende weert 1 Ic weet een Maget suuerlic des wil ic my verblyden nyemant en sach al oers gelic nv noch tot genen tyden sy is solaeslic bauen al ende bauen allen maegden verciert in hemelryke 2 Lustentlic is oer aengesichte die edelle maget fyn sy is die
[pagina 32]
bauen die steernen licht soe claer is hoer aenschyn Hoe reyne is oer hoer aengedacht ick wyl in hoere genaeden gaen by dage ende oec by nachte 3 Och wolde se my gedencken die godtelicke maget die viant die my crencket hi solde syn verjaget wt myne wege solde hi gaen die my tot allen tyden soe dicke heeft leyde gedaen 4 Die Maget is seer schoen gedaen mit lustenlicke wesen mocht ic in hoere genaeden gaen soe waer myne ziele genesen mocht ic des weerdich syn oer mynne doet my leuen al is sy veer van my 5 Op oer set ic myn toeuerlaet die edelle Conyngynne si is soe schonen dageraet sy verlicht
[pagina 33]
dat herte myn sy is myns leydes verdryf ende bauen alle magheden verciert is al oer lyf 6 Ick en kan sy niet vollprysen nae hoere weerdicheit die vrouwe des paradises och waer ic des bereyt ende dat ic quame daer by soe solde myn herte in vrouden syn dat seer bedrucket is 7 Hoer mynne ende oec hoer wesen dat is my altoes by sy is soe hoge verheuen want sy des weerdich is by Jhesus hoeren soen nv wilt al myns gedencken Maria maghet schoen Amen