Haagse liederhandschrift

8. [Nu dicwile hordic lesen]

Nu dicwile hordic lesen
Ein deel van deser werelt wesen;
Daer hordic menige vremde worde.
In dien worden ic verhoerde
Een point, dat wil ic u vertrecken,
Want men bad's mi niet te decken:

[fol. 4vb]

 

God ende die werelt, dese twee

 

Die zullen te rechte zin ghevee

 

Die na den punten niet en werken,

10

Want men mach er doecht an merken.

 

Nu mogedi vragen: Noydekin,

 

Wat mach dat edel punte zin,

 

Dar god ende die werelt beyde in rust?

 

Hi mach's hier horen, wie dat lust:

15

Dat's 't leven, darboven zo en is niet.

 

Ghi edel heren, dit beziet!

 

Bekent u, waen dat ghi zijt comen,

 

Bekent dat scheiden, het sal u vromen.

 

Kent uwen god vor uwen here,

20

Eert uwen here, dat's u ere.

 

Ic segge dat men ter warheit vint:

 

Die zinen here niet en mint,

 

Sin here latene ongeloent.

 

Wat in desen worden woent,

25

Dat kenne ende merke elc man.

 

Ich in wil, noch ich en kan,

 

Noch en dar daer niet af spreken.

 

Hem mach nemmermeer gebreken

 

Der werelt lof noch goeds eere,

30

Sowie dat eert sinen here.

 

Die heren moten heren bliven,

 

Dat soude te recht elc vroet man scriven;

 

Mar den heren es een dinc bevolen,

 

Dat blijft van mi al onverholen,

35

Dat's dienst te lonen bi bescheide:

 

Die here war wijs, die dat dede,

 

Want god die loent sinen vrient,

 

Die met goeder truwen dient.

 

Die dienst soude zin vor ogen,

40

So mocht elc mensche na diensten pogen.