De Gulden Passer. Jaargang 60

51. Virtus vnita valet.

La mer ne gaste rien, son sel ne pourrist point,

Et ores qu'elle soit par les vents agitee,
Si est elle tousiours ferme en son premier point,
Ne pouuant en son tout iamais estre gastee,

Toutesfois s'on la faict aux maretz escouler,

Elle pert sa vertu, & sa force estendue
Par vn tel changement s'ejuanouit en l'air,
Et par autre douceur sa salure est perdue.

Ce qui est amassé est beaucoup plus puissant

Que ce qui est espars. & d'auantage dure
Cela qui est tousiours dedans son lieu croissant,
Dont estant transporté il change de nature.

O vous, Princes puissans, soyez d'un mesme accord,

Pour prester vostre main à la pauure patrie,
Qui au milieu des eaux ne peut venir à port,
Et pour la secourir humblement vous supplie.

Resouuenez vous donc de ce grand Roy Hongrois

Qu'on nommoit Mathias, & dont la renommee
Faict encore trembler les gendarmes Turquois
Sur lesquels il conduit vne vaillante armee.

Ne vous separez point par vn mauuais vouloir,

Faictes que l'amitié qu'un chacun de vous porte
Au profit du païs, nous face apperceuoir
Combien sur le discord elle doibt estre forte.