De Gulden Passer. Jaargang 60

25. Subitae diuitiae obliuiosae.

Alors que la richesse

Par deuers nous s'addresse,
Et qu'estans otieux
Nous sommes faicts heureux,
Lors nous n'auons la cure
De la grandeur de Dieu,
Et negligeons le lieu
Là ou le pauure endure.

Lors le diuin seruice

Ne reçoit nostre office,
L'esprit qui rien ne void,
Le futur ne preuoit:
Ne mesme la tempeste
Qu' au plus haut de la mer
Le vent vient animer
Pour tomber sur sa teste.

Mais à l'heure qu'il pense

Estre en grande asseurance,
Il sent subitement
La grandeur d'un tourment
Qui tousiours le seconde,
Et ne le veult lâcher,
Mais le faict trebuscher
Dans la fosse profonde.

Ayant donc de fortune

La faueur opportune
Il la faut temperer,
Et ne trop esperer:
Car elle estant doubteuse
Retourne aussi souuent
Qu'on void tourner le vent
En la mer orageuse.