De Gulden Passer. Jaargang 60

11. Vniuersus status, ἢλαοϰρατíα.

Les poëtes ont dict des fourmis la naissance

De l'homme auoir esté extraicte quelque fois.

Dont elles ont encor le sens & preuoyance:

Toutesfois elle vont libres de toutes loix,

S'amassant par les monts en troupes desbandees

Sans estre par vn Roy, ou par vn chef guidees.

Peu de cas les esmeut, sans ordre & sans conduicte,

Elles sont seulement poussees de fureur,

Vn grand bruit estonnant les met toutes en fuitte,

Encependant qu'aux champs le soigneux laboureur

Rassemble les esseins de ses auettes belles,

Pour habiter encor dans les rûches nouuelles.

Lors que les citoyens viuent sans ordonnance,

Chacun voulant regner à sa discretion,

Le droict n'a pont de lieu, aussi n'a la puissance,

Il n'y a que tumulte & que sedition.

Le bon pour recompense a seulement enuie,

Et la meschanceté est tousiours impunie.

Ainsi qu'vn tourbillon predisant la tourmente

Sur les borts sablonneux d'Ocean irrité:

Ainsi est leur police à iamais inconstante.

Laisse-les si tu veux viure en tranquillité,

Et si tu veux ensuyure vne ferme constance:

Car on ne trouue point au peuple d'asseurance.