De Gulden Passer. Jaargang 58-59

40. Verraders worden oueral ghehaet.

Nemmermeer en siet de liefde die blint is

Wat reden gebiedt, oft wat nut is en bequame
Maer wort gedreuen als die ontsint is
Tot, dat sy volbracht heeft, niet achtende blame
Haer voornemen, brengende haer huys lofsame
En haer seluen in seer grooten druck en weene.
Wie heeft den Coninc Nisus van grooten name
Van sijn rijck berooft? voorwaer anders gheene
Dan sijn dochter Sylla door haer liefde onreene.
En wat heeftse toch daer af gehadt te loone?
Heeftse daer door verworuen de liefde gemeene
Van Minos den Coninc van Creten schoone?
Neense voorwaer: maer wert verstooten van sijnen troone
Want die den viant zijns vaderlants bystant doet
Door onreynen lust oft ghiften idoone,
Die wort van elck versooten in allen landen goet.
Wat troost sou een verrader toch geuen connen
Diens vader dat berout dat hijen heeft gewonnen,
Ende nerghens meer ghelooft vanden wijsen vroet.