Doe wort si beschaempt, ghelic enen mensche die daer ontspringt wt enen wonderlijken drome.
Ende Gautier seide voert: Griselde, ghi sijt mijn wijf alleene, ende anders en heb ic gheene gehadt, noch nummermeer hebben en sal. Dese maghet, die ghi hier siet voer mijn bruyt, is v dochter ende die mijne: ende dese ionge man, den welcken men hout voer mijnre susters sone, der grauinnen van Buenen, is onser beyder kint, welcke twee kinderen ghi hebt altoes gewaent verloren te wesen, ende nu hebdise te samen vonden. Ende ic wil dat elc weten sal dat ic noyt bedocht en was mijne kinderen te doden, mer ick hebbe dyt gedaen om v te ondersoecken ende te proeuen.
Ende als Griselde dat hoerde, van bliscapen viel sy neder in onmacht, als van hoer seluen nyet wetende. Ende als si tot hoer seluen quam, soe en conde si nyet versaden van helzen ende van cussen hoer kinderen.
Die vrouwen ende ioncfrouwen namen Griselden ende leyddense in een camer, daer si ontcleet wort van horen quaden clederen. Ende si wort mit groter weerdicheden vercleet mit eerbaren ende dierbaren cleederen, als si plach te draghen ter tijt als si mit Gautier, horen man, was int palleys mit hem wonende, ende daer nae int lant van Saluzen, mit groter bliscap.
Ende van blyscapen was daer gheweent menighen traen. Ende doen, op dien dach, soe was die feeste meerder dan sy was ter ierster bruloft van Gautyer ende Gryselden.
Ende doen ten alder iersten dede Gautier comen in zijn
Auteursrechtvrij