Die historie vander goeder vrouwen Griseldis, die een spieghel is gheweest van patientien

[p. 14]

Hoe ende mit wat stade dat Gautier, die marcgraue van Saluzen sijn bruyt trouwede, ende wat feeste dat daer bedreuen was.

Als dese dinghen, daer wi af ghesproken hebben, aldus geschyet waren, soe liet Gautier, sonder vertreck, ghereeschap maken totter bruiloft. Hi liet daer comen enen bisscop, priesteren ende clercken, om dat werck dat hi begonnen hadde eerliken te volbrenghen.

Als sijn hof aldus te vollen daer af bereyt was, soe is hy ghegaen mit allen sijnen vrienden ende edelen om sijn bruyt te trouwen, mit alsulker eeren als of hi genomen hadde eens keysers dochter. Daer was grote blijscap onder den volke, ende oeck verwonderen ¹. Nye en hadden sy alsulcken schonen staet ghesyen in dyen lande, als daer was bedreuen.

Dit aldus gheschiet sijnde, ende wettelijc, metten vollen gerechte der heyligher kercken, sijn bruyt ghetrout hebbende, soe sijn si te samen mit groter blijschapen wederom ghekeert tot sijnen houe, dat seer schoen was ende soe costelicken of men daer eenen keyser ghetracteert soude hebben ende ontfanghen. Daer waren versaemt veel eedelheeren ende ioncheren ende baroenen, vrouwen ende ioncfrouwen.

1 Verwonderen, in plaets van: verwonderinge.

[p. 15]

Daer was ouergrote vruechde: men hielt daer open hof, ende een ieghelijc was daer onthouden, van waer dat si quamen, alsoe langhe als dye feeste duerde.

Als dese dinghen volbracht waren, mit groter blijschappen, so sijn si alte samen ghesceiden, ende een ieghelic toech weder om tot sinen lande.

Griselde droech hoer in haren huwelijc soe wijslijcken ende sedelijck dat sy scheen te wesen van hogher aert ende van edelen geslachten. Ende diese niet ghekent oft ghesien en hadde, noch hoeren vader, noch hoer gheslachte, hi hadde ghewaent dattet gheweest hadde eens conincs dochter: ende scheen bet opghehouden te wesen in eens conincs palays dan elders. Ende si sprakens alle Gautier groete ere dat hyse ghenomen hadde tot eenen wijue: want het scheen dat hoer God bi voersienicheit bouen anderen vrouwen ghemaect ende neder gesent hadde. Ende si maecte in absentien van horen heere, als hi daer niet bi en was, pays ende vrede daert van node was, nae hoere macht.

Daer nae soe wort sy grof met kinde, daer sy af ghenas, als den tijt quam, twelc was een dochter.

Ende als dese dochter out was drie jaer, so quam Gautier tot Griselden, ende hi gelyet hem oft hi toernich had gheweest, segghende: Griselde, ghi weet hoe ghi comen sijt in mijn huys: ende al ist dat ick v lief hebbe, mijn edelen en hebben v niet alte lief, ende sonderlinghe om dat ghi een kint bi mi gedraghen hebt: want sy hebben grote ongenoechte dat si onderdanich sullen moeten sijn alsulcken heere ende vrouwen van alsulcken nederen ge-

[p. 16]

slachte als ghi sijt. Daer om is mi van noede, gemerct dat ghi wilt houden die vryenschap van mijnen luden, dat ick doe mit uwer ionger dochtere hoerluden wille ende niet den mijnen. Daer si beuelic v dat ghi ghedoechtsaem sijt int gene dat ic doen sal, ghelijc ghi mi beloefde, op dier tijt als wi vergaderden.

Op twelcke Grijselde, haer wijslijc hier in hebbende, niet beroert of bedroeft wesende, antwoerde aldus: Ghy sijt mijn here, dese ionge dochter ende ick sijn uwe, aldus moecht ghi mit den genen dat uwe is uwen wille doen ende v beliefte. Ende int ghene dat v genoechlijc is en wil ic geen onghenoechte maken. Ick en beghere niet meer te hebben dan uwe vrienschap, ende ic en verduchte niet meer dan v te verliesen. Ende dit is my geplant in mijn herte ende sal bliuen tot in mijn doot.