Het godshuis van Sint-Jan & Sint-Pauwel te Gent, bijgenaamd de Leugemeete

Oorkonden

XXXIV.

⁺ 1426. - Copie van tween messen de weke, te wetene smaendaeghs ende svriindaeghs, waer toe jaerlicx staet XVIII s. gr., vallende te Kerssavonde ende Tsente Jans messe, besedt up de Pale bijder Waelpoorte, niet verre van onsen godshuuse.

Kenlic zij allen lieden dat Jan Valke, Fransoys sone, ende Katheliine Martins, ziin wetteliic wijf, commen ziin voor scepenen vander Kuere in Ghend, kenden ende lijdden dat zij ter eeren van Gode, ter salicheit van haerlieder zielen ende over alle zielen daer zijs over begheerende ziin, uut rechter devocien hebben gheordonneert ende ordonneren twee messen de weke van nu voort an te

+ F^o XLV v^o.

[p. 54]

doene eeuwelic ende erfelic duerende, in Sente Jans ende Sente Pauwels huus ter Waelbrugghen, te wetene es, deene messe elex smaendaeghs, ende dander messe elcx svriindaeghs. De welke zij ende de lancxt levende van hem beeden, sullen doen doen also langhe als zij leven sullen; ende als sij ghevaren sullen ziin van live ter doot, so sullen de priesters die naest van haren bloede wesen sullen, te wetene es, een van Jan Valcx zijde, ende een van Katheliinen, ziins wijfs, sijde, de vors. twee messen de weke, elc van beeden deene, moghen doen int vors. godshuus; ende altoos also voort de priesters die naest van haerlieder bloede commen siin, de naeste ziinde, de vors. messen alsoe te doene up dat hemlieden ghelieft. Ende daer sij of eenich vanden tween daer af in ghebreke waren, dat zij dan van dien ghebreke niet hebben of heffen en sauden; ende dat dan de vooghde vanden vors. godshuuse, diedt dan siin zauden, ghehauden sauden wesen de vors. messen anderen priesteren te doen doene...Ende hier toe hebben de vors. Jan Valke ende Katheliine, siin wijf, gheordineert ende ghegheven achtien scelle grooten tsiaers, eeuweliker ende erfeliker renten...bepandt up haerlieder behuusde stede, twelke es eene brauwerie gheheeten de Pale, bijden spriete bijder Waelpoorten, daer sij nu in wonen, tusschen her Arende van Ghend, andeen sijde, ende Baudin Jacops, waghemakere, an dandere sijde...achter uut commende up Sente Lijsbetten gracht...Hier over stont als lantheere, inden name vander Lazerien, broeder Jacop vander Zickelen, mids dat hem scepenen wijsden. Dit was ghedaen den dertiensten dach in septembre int iaer XIIII^e zesse ende twintich...’

(Geteekend:) Wale.