Het godshuis van Sint-Jan & Sint-Pauwel te Gent, bijgenaamd de Leugemeete

Oorkonden

XIV^sexto.

⁺ 1437. - Copie ende updracht vanden vorn. tsaertre van drie pont xii s.p., up ghedreghen den goodshuuse bij Katheliinen van Ghijse, omme den aermen tuerven mede te coopene.

‘Kenlic zij allen lieden dat Katheliine van Ghijse, haer sellefs wijf ziinde, commen es voor scepenen vander Kuere in Ghend, kende ende lijdde dat zo, in puerer aelmoessenen, omme de minne van Gode, heeft up ghedreghen ende ons ghegheven, Willemme Solderman ende meester Philipse vander Duust, als vooghde van Sente Jans huuse ter Waelbrugghen, eenen wettelicken tsaertre van drie ponden XII scelle paris. ervelicker renten...; omme daer

+ F^o XVII.

[p. 32]

mede jaerlicx te coopene tuerven te berniinghen int svors. godshuus, den aermen pilgheriinen ende gasten die daer ter herberghen commen sullen, bij te waermene, ende die dueghdelic daer toe te distribuerene, teeu weliken daghen, sonder den vrauwenamen wonende int vors. godshuus, of yemende anders eenich recht an te hebbene. Ende dese vorseide aelmoessene altijds ingaende te Aller Heleghen messe in elc jaer, ende dan elcx avonds stellende een vier van tachtentich tuerven, also langhe als de tuerven dueren sullen diemen jaerlicx coopen sal metten vors. VI s. gr. tsiaers. Twelke de vorn. voochde, over hem lieden ende over al haer naercommers, belooft hebben te vulcommene ende te vuldoene teeuweliken daghen, ende dit ingaende te Aller Heleghen messe in dit jaer XIIII^e ende XXXVII, mids dat de vooghde de VI s.g. ghereet ontfaen hebben. Dit was ghedaen den VIII^sten dach van octobre int iaer XIIII^e ende XXXVII...’

(Geteekend:) Wale.