Het godshuis van Sint-Jan & Sint-Pauwel te Gent, bijgenaamd de Leugemeete

Oorkonden

[p. 25]

XII.

⁺ 1389. - Chaertre van twee ende veertich scelle ende viere penniinghe parisise, vallende telken Kerssavonde, ligghende Over Brouc.

‘Wij, Jacop Symoens, baliu ende wettelic maenre miinre vrauwen der abdessen vanden nieuwen cloostere anden Groenen Briele, ende Gheerom (sic) Borluuts, up harer beeder heerscepe buten der Waelpoorte, in de prochie van Eckerghem..., Rogier van Brakele, Joos Diedericx ende Jan vanden Walle, alse late up beede de vors. heerscepe, ten selven tijden, doen te wetene....dat....joncf. Mergriete uten Ramen, Pieters weduwe van Rijhaghen, heeft verkent ende verlijdt dat so heeft vercocht wel ende redenlike Pieter Volkaerde twee ende veertich scelliinghen ende viere penniinghen paris. tsiaers erveliker ende eeuwelicker renten. De welke ervelike rente vors. es gheieghen Over Brouc, ande strate neven Jan Lusscaerts stede, ande zijde te Kerstiaen Baerts stede waert, up een stic erven groot wesende hondert achte ende twintich bedden, lichtelic min of meer; de welke erve toebehoorde, in tijden voorleden, Lijsbetten vander Muelen ende, up den tijt van nu, toebehoort Willemme vanden Plassche....Ende dese vors. ervelike rente die was gheboden metter erven vors. ter kercken met drien sondaechs kercgheboden, also men erve sculdich es te ghebiedene naer costume ende usage vanden vors. heerscepen; ende daer naer so quam joncfr. Mergriete vors. ende begheerde hare te onthutene ende te onthervene van deser vors. erveliker renten; en daer so wart haer ghegheven een diinghelic voocht te harer begheerten ende dien bij wette, also daer toe behoorde,

+ F^o IX.

[p. 26]

mids dien dat hare voocht behoufde in dese sake; ende doe maende de baliu vors. de vornomde late ofte zij dese vors. ervelike rente kenden gheboden ter kerken, also voorscreven es, ende de laten die berieden⁽¹⁾ hem; ende daer naer, uter kennessen die zij hadden van manlinc anderen, so kenden zij dese vors. ervelike rente gheboden ter kercken, also voorscreven es, ende sonder calaenge uter kercke commen; ende doe drouch joncfr. Mergriete vors. dese vors. ervelike rente den heere in handen, met haren diingheliken voocht, metten alme ende met sprekende monde, scoopers bouf of diese sculdich ware te hebbene metten rechte en die der ghiften weerdich ware; ende daer naer so warpere joncfr. Mergriete vors. ende haer diinghelike voocht, ende dat al bij maniinghen ende bij vonnessen die daer toe behoorden; ende Pieter vors. die wartter toe ghedaen alse te ziinen propren ende gherechten coopgoede, also daar toe behoorde...int iaer Ons Heeren.., dusentich drie hondert viere waerven twintich ende neghene, den dertienden dach in meye..’

(1) Beraadden.