Een gheestelijck lust hofken

Met schoone lieffelijcke geestelijcke ghesanghen beplant, door eenen Catholijcken pastoor

Een Geestelick Liedt, van eenen suchtende na eenen Gheestelicken Staet.

Op de wijse: Van u droefheyt wilt ontspringhen.

O Heere mijn God, mijn schepper pur[e]
Ghy kent mijn crancheyt en natur[e]
Ghy weet mijn onperfecte quaet
Wilt my bewaren, stueren, leeren
Dat ick mach komen, t'uwer eeren,
In eenen heyligen goeden staet.

Wilt my, &c.

V soete liefd' heeft my ontsteecken,

Inwendich comt ghy tot my spreecken
Door uwen soeten wijsen raet:
Dat ick de werelt sal afsnijden,
Om u te dienen t'allen tijden,

[p. 135]

 

In eenen heyligen goeden staet.

 

Dat ick, &c.

 

Somtijts ben ick van goeden wille,

 

Om u, mijn Godt, te dienen stille,

 

In alle deuchden delicaet,

 

Maer door my kan ick 't niet volbrengen

 

Dus wilt my door u graci brengen,

 

In eenen heyligen goeden staet.

 

Maer door, &c.

 

Mijn vleesch soect zijn gemac te houden

 

Dit doet u liefd' in my verkouden,

 

Want traegheyt treckt met haren draet

 

Wilt dese traegheyt van my jagen,

 

Dat ick u soete jock mach dragen,

 

In eenen heyligen goeden staet.

 

Wilt dese, &c.

 

Die werlt soeckt my aen alle zijden,

 

Haer dienaers komen my bestrijden,

 

Voor my stroeyend' venijnich zaet,

 

Wilt my bewaren van haer vlecken

 

Laet my u goede gracy trecken,

 

In eenen heyligen goeden staet.             Wilt, &c.

 

Wilt my u goede gracy geven

 

Dat mijn jonck herte wort gedreven,

 

Om te vercieren metter daet,

 

Een salich oorden op der eerden,

 

En dat ick daer in mach volheerden,

 

In eenen heyligen goeden staet.

 

Een salich, &c.

 

Laet my u gracy niet verliesen,

 

Dat ick dat beste deel mach kiesen,

 

Dat alle dingh te boven gaet,

[p. 136]

 

Hier wel te leven al mijn dagen,

 

Na uwen wil, en welbehagen,

 

In eenen heyligen goeden staet.

 

Hier wel, &c.

 

O Heer, ghy kent alle mijn saken,

 

Wilt my devoot, en vierich maken,

 

Verhoort mijn bede, vroech en laet

 

Dat ick met ziele, en lichame,

 

V hier mach dienen, seer bequame,

 

In eenen heyligen goeden staet.

 

Dat ick, &c.

 

Princelicke Bruydegom schoone

 

Ghy zijt mijn vreucht, glory, en croone,

 

Geeft my een Geestelick cieraet,

 

Wilt alle quaet hier van my wenden

 

Dat ick mijn leven mach volenden

 

In eenen heyligen goeden staet.

 

Wilt alle, &c.