Den gheheelen Bybel, Inhoudende het oude ende nieuwe Testament (Leuvense bijbel 1548)

* Dat .v. Capittel.

+ 1

⁺ALle die ghelooft dat Iesus is Christus, die is wt Gode gheboren. Ende alle die hem lief heeft die ghegenereert heeft, die heeft oock lief den ghenen die van hem gheboren is.

+ A

2

Daer aen kennen wy dat wy Godts gheboren kinderen lief hebben, als wy Godt lief hebben, ende sijn gheboden doen.

3

Want dit is Gods liefde dat wy sijn gheboden souden bewaren, ende sijn gheboden en sijn niet swaer.

+ 4

Want alle dat wt Gode gheboren is, dat verwint die werelt. * Ende dit is die victorie die de werelt verwint, ons ghelooue.

5

Wie isser die de werelt verwint, dan die ghelooft dat Iesus is die sone Godts?

6

⁺Dese is die ghecomen is doer dwater ende bloet Iesus Christus, niet int water alleen, maer int water ende bloet. Ende tis den gheest die betuycht dat Christus die waerheyt is.

+ B

7

Want drij isser die ghetuyghenis gheuen inden hemel. Die vader, dwoert, ende die heylighe gheest, ende dese drij sijn een.

8

Ende drij esser die ghetuyghenis gheuen op deerde. Den gheest, dwater, ende tbloet, ende dese drij sijn een.

9

Eest dat wy der menschen ghetuyghenis ontfanghen, Gods ghetuyghenis is meerder, want dat is Gods ghetuyghenis dat meerder is, dat hy ghetuycht heeft van sijnen sone.

10

Die in Gods sone ghelooft, die heeft Godts ghetuyghenis in sij seluen. * Die in den sone niet en ghelooft, die maect hem looghenachtich, ⁺want hy niet en ghelooft int ghetuyghenis dat Godt ghetuycht heeft sijnen sone.

+ C

11

Ende dit is tghetuyghenis, want ons Godt het eewich leuen ghegheuen heeft. Ende dit leuen is in sijnen sone.

12

Die den sone heeft, die heuet leuen, wie den sone Godts niet en heeft, die en heeft het leuen niet.

13

Dit scrijue ick v lieden om dat ghy weten soudt dat ghy deewich leuen hebt die ghelooft inden naem des soons Gods.

14

Ende dit is tbetrouwen dat wy tot hem hebben dat hy ons hoort soe wat wy begheren nae sijnen wille.

15

Ende wy weten dat hy ons hoort wat wy begheren, wy weten dat wy hebben die begheerten die wy van hem bidden.

16

⁺Soe wie weet dat sijn broeder sondicht een sonde niet ter doot, die bidde, ende dleuen sal hem ghegheuen worden, die daer sondicht niet ter doot. Daer is een sonde ter doot, daer voer en seg ick niet dat iemant bidde.

+ D

17

Alle ongherechticheyt is sonde, ende daer is een sonde ter doot.

18

Wy weten dat alle die wt Gode gheboren is niet en sondicht, maer Godts generatie bewaert hem, ende die boose en raect hem niet.

19

Wy weten dat wy wt Gode sijn, ende die gheheel werelt is int quaet ghestelt.

20

Ende wy weten dat die sone Godts comen is, ende hy heeft ons den sin ghegheuen dat wy kennen souden den warachtighen Godt, ende dat wy sijn souden in sijnen warachtighen sone. Dit is die warachtighe Godt, ende het eewich leuen.

21

Kinderkens bewaert v seluen van die afgodsbeelden. AMEN.

Hier voleyndt dierste Epistel van Sint Ian Apostel.