Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .iij. Capittel.

1

⁺SIet desen tweeden brief scrijf ick tot v alderliefste broeders metten welcken ick vermane v reynen sin tot een ghedenckenisse,

+ A

2

op dat ghy ghedachtich soudt wesen der woerden die ick v te voren gheseyt hebbe van die heyleghe propheten, ende van uwen Apostelen, ende der gheboden ons Heeren ende salichmakers.

3

Dit ten iersten wetende

[p. *909]

datter in die laetste daghen bedrieghers comen sullen met bedroch, nae hen eyghen lusten wandelende,

4

segghende, Waer is sijn belofte, oft toecoemste? Want van dat die vaderen ontslapen sijn, soo sijn alle dinghen alsoo altijt ghebleuen van tbeghinsel der sceppinghen.

5

⁺Want al willens en weten sij niet dat die hemelen hier voertijts waren, ende die eerde wten water, ende doert water, staende doert woert Godts,

+ B

6

doer die welcke die werelt doen oueruloten vanden water vergaen is gheweest.

7

Maer die hemelen die nu sijn ende die eerde sijn doer tselue woert wederom ghestelt, den viere bewaert teghen den dach des ordeels ende der verdoemenissen der ongoddelijcker menschen.

8

+ Maer dit een dinck en sij v niet verborghen alderliefste, dat eenen dach by den Heere is ghelijck duysent iaren, ende duysent iaren als eenen dach.

9

Die Heere en vertrect sijn belofte niet, alsoo die sommighe meynen, maer hy doet lancmoedelijck om uwen wille niet willende datter eenighe souden verloren gaen, maer dat sij alle souden tot penitencie wederkeeren.

10

⁺Maer den dach des Heeren sal aencomen als een dief, in welcken dach die hemelen met een groot ghedruysch sullen vergaen, maer die elementen sullen van die hitte smelten, ende die eerde ende die wercken die op haer sijn sullen verbrant worden.

+ C

11

Daer om als alle dese dinghen sullen verdoruen worden, hoedanich behoorde ghy lieden te sijn met heyleghe wandelinghen ende Godts diensticheden,

12

verwachtende ende haestelijck loopende nae die toecoemste van den dach des Heeren, doer den welcken die berrende hemelen smelten sullen, ende die elementen doer den brandt des viers verdwijnen?

13

Maer wy verwachten nae sijn beloften nieuwe hemelen ende nieuwe eerde, daer die rechtuerdicheyt in woont.

14

⁺Daer om alderliefste dese dinghen verwachtende weest neerstich dat ghy moecht ombesmet ende onghescent voer hem gheuonden worden in vreden.

+ D

* 15

Ende die lancmoedicheyt ons Heeren acht voer uwe salicheyt, ghelijck oock ons alderliefste broeder Paulus nae die wijsheyt die hem ghegheuen is, tot v lieden ghescreuen heeft,

16

ghelijck hy ooc in alle sijn Epistelen doet sprekende daer in van dese dinghen. In welcke epistelen sijn sommighe dinghen swaer om te verstaen, welck die ongheleerde ende onghestadighe verargheren ghelijck sij oock doen die andere scriftueren, tot hens selfs verdoemenisse.

17

Daer om ghy broeders dit te voren wetende, bewaert v dat ghy doer der dwaser dwalinghe verleydt niet en valt van v eyghen vasticheyt,

18

maer wast in die gratie ende kennisse ons Heeren ende salichmakers Iesu Christi. Hem sij glorie nu oock ende inden dach der eewicheyt AMEN.

Hier voleynt die tweede Epistel van Sinte Peeter.