Den gheheelen Bybel, Inhoudende het oude ende nieuwe Testament (Leuvense bijbel 1548)

Dat ierste Capittel.

1

⁺SYmon Petrus een dienaer ende Apostel Iesu Christi den ghenen die ghelijck ghelooue met ons te deele vercreghen hebben, in die rechtuerdicheyt ons Godts, ende ons salichmakers Iesu Christi.

+ A

2

Gratie en vrede moet v lieden veruult worden in die kennisse Godts ende Christi Iesu ons Heeren,

3

ghelijck alle dinghen sijnder goddelijcker cracht die ten leuen ende Godts dienst ons ghegheuen sijn, doer die kennisse van hem die ons gheroepen heeft doer sijn eyghen glorie ende cracht,

4

⁺doer den welcken hy ons zeer groot ende costelijcke beloften ghegheuen heeft, om dat ghy hier doer soudt deelachtich worden der goddelijcker natueren, vliedende die verderffenisse der wellusticheyt die in die werelt is.

+ B

5

Maer ghy lieden alle sorchuoldicheyt daer toe doende bedient in v ghelooue duecht ende in die duecht wetenheyt,

6

ende in die wetenheyt, abstinencie, ende die abstinencie lijdtsaemheyt, maer in lijdtsaemheyt Gods diensticheit,

[p. *908]

7

ende in die Gods diensticheyt die broederlijcke liefde, ende in die broederlijcke liefde, die ghemeyn liefde Godts.

8

Want eest dat dese dinghen v lieden by zijn ende oueruloeden, soe en sullen v die niet ydel ende sonder vrucht stellen, in die kennisse ons Heeren Iesu Christi.

9

Want soo wien dese dinghen niet by en sijn, die is blent, ende metter hant tastende, verghetende die suyueringhe van sijnen ouden sonden.

10

Waer om broeders weest te meer neerstich dat ghy doer goede wercken moecht uwen roep, ende verkiesiinghe seker maken, want dese dinghen doende, en suldi te gheenen tijde sondighen.

11

Want also sal v lieden ouervloedelijck bereydt worden den inganck in dat eewich rijck ons Heeren ende salichmakers Iesu Christi.

12

⁺Waer om soo sal ick beghinnen v altijt te vermanen hier af, die nochtans voerwaer wetende ende gheuesticht sijt in die teghenwoerdighe waerheyt.

+ C

13

Ende ick houde dat voerrecht (dat soo langhe als ick in dit tabernakel ben) ick v sal verwecken tot een vermaninghe,

14

seker wesende dat het aflegghen van mijn tabernakel seer corts comen sal, nae dat ons Heere Iesus Christus my heeft te kennen ghegheuen.

15

Ende ick sal daer neersticheyt toe doen dat ick v lieden in dien oock dicmael hebben mach nae mijn doot, dat ghy deser dinghen ghedachtich moecht wesen.

16

Want wy en sijn gheen ongheleerde fabulen geuolcht als wij v vercondicht hebben ons Heeren Iesu Christi cracht, ende voorwetenheyt, maer wy sijn besienders gheweest sijnder grootheyt.

17

Want hy vanden vader ontfanghende glorie ende eere, als daer een alsoodanighe stemme nederuiel tot hem van die heerlijcke glorie. ⁺Dit is mijn beminde sone inden welcken ick my behaecht hebbe, hoort hem.

+ D

18

Ende dese stemme hebben wy ghehoort ghebracht vanden hemel, doen wy met hem waren opden heylighen berch.

19

Ende wy hebben een vaster woert der propheten, dwelcke ghi aenmerckende doet wel, als op een licht dat lichtende is in een duyster plaetse, tot dat den dach beghint claer te worden, ende dat die morghensterre op gae in v lieder herten.

20

Dit ierstmael verstaende dat gheen scriftuere der propheten ghemaect en wort doer eyghen verclaringhe.

21

Want die prophetie en is noyt ghebracht gheweest doer den menschelijcken wille. Maer nae dat hen den heyleghen gheest inghegheuen heeft, hebben die heyleghe menschen Godts ghesproken.