Den gheheelen Bybel, Inhoudende het oude ende nieuwe Testament (Leuvense bijbel 1548)

Dat ierste Capittel.

1

⁺PEETER een Apostel Iesu Christi den vercorenen vreemdelinghen der verstroytheyt van Ponten, Galatien, Cappadocien, Asien, ende Bithynien

+ A

2

nae die voorwetenheyt Gods des vaders tot heylichmakinge des geests ter ghehoorsaemheyt ende bespraeynghe des bloets Iesu Christi. Gratie ende vrede worde v lieden vermenichfuldicht,

3

Ghebenedijt sij Godt ende die vader ons Heeren Iesu Christi, die nae sijn groote bermherticheyt ons wederom ghebaert heeft tot een leuende hope, door die verrijsenisse Iesu Christi wt den dooden,

4

tot een ombederffelijcke ende onbesmette ende onuerganckelijcke erffenisse die daer is bewaert in die hemelen om v lieden,

5

die door die cracht Gods bewaert wort, doort ghelooue ter salicheyt, bereyt om gheopenbaert te worden inden wtersten tijt,

6

In die welcke ghy v verhueghen sult, al eest dat ghy nv een luttel tijts moet bedroeft sijn in versceyden temptacien,

7

op dat die proeuinghe ws gheloofs veel costelijcker dan gout (dat doort vier gheproeft wordt) gheuonden worde, ten loue, ende glorie, ende eere, ⁺in die openbaringhe Iesu Christi,

+ B

8

den welcken ghy lief hebt hoewel ghy hem niet ghesien en hebt, inden welcken ghy nv ooc hem niet siende ghelooft, ende gheloouende verhuecht v met een onsprekelijcke ende gheglorificeerde blijscap,

9

medebrenghende het eynde ws gheloofs, te weten die salicheyt der zielen,

10

Van welcker salicheyt die propheten ondervraecht ende ondersocht hebben, die van die gratie v lieden toecomende ghepropheteert hebben,

11

ondersoeckende in welcken oft hoedanighen tijt in hen den gheest Christi beteekenen soude, vercondighende dat selue lijden, ende die toecomende glorien,

12

den welcken gheopenbaert is, dat sij niet voor hen seluen, maer voor v lieden die dinghen aenbrochten die nv vercondicht sijn v lieden, door die ghene die v Deuangelie vercondicht hebben. Den heylighen gheest vanden hemel ghesonden wesende, inden welcken die Enghelen begheeren te aenscouwen,

13

Waerom omgort sijnde aen die lendenen ws herten, ⁺sober wesende hoopt volcomenlijck in die gratie die v lieden ghepresenteert wort in die openbaringhe Iesu Christi

+ C

14

als kinderen der ghehoorsaemheyt, niet ghelijck gheworden den voorgaenden wellusten uwer onwetenheyt,

15

maer nae dien heylighen die v lieden gheroepen heeft, weest ghi ooc in alle uwe wandelinghe heylich,

16

Want daer is ghescreuen: Ghy sult heylich wesen, want ick ben heylich,

17

Ende eest dat ghy hem vader aenroept, die sonder wtnemen der persoonen ordeelt, nae dwerc van eenen ieghelijcken, soo wandelt met vreesen binnen den tijt van uwer pelgrimagien.

18

+ Wetende dat ghy niet verlost en sijt met verganckelijck gout oft siluer van v ydel wandelinghe, van uwer vaderen leeringhe,

19

maer met den costelijcken bloede Christi als van een onbesmet ende onbeulect lam,

20

die voorsien is gheweest voor dat schepsel der werelt, ⁺maer gheopenbaert in die wterste tijden, om v lieden

+ D

21

die door hem gheloouich sijt in Gode, die hem vanden dooden verwect heeft, ende heeft hem glorie ghegheuen, om dat v ghelooue ende hope in Gode sijn soude,

22

V zielen suyuer makende in die gehoorsaemheyt der liefden, in die simpel liefde der broederlijcheyt, hebt wter herten malcanderen lief neerstelijcken

23

wederom gheboren sijnde niet wt verganckelijck, maer wt onuerganckelijck saet, door dwoort des leuende ende inder eewicheyt blijuende Godts,

24

Want alle vleesch is als gras, ende alle sijn glorie is als die bloeme des gras, het gras is verdroocht, ende sijn bloeme is afgheuallen,

25

maer dwoort des Heeren blijft inder eewicheyt, ende dat is dwoort dat doort Euangelie ghepreect is onder v liedeu.