Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .ij. Capittel.

1

⁺VVant ick wil dat ghy wetet watten sorchuuldicheyt dat ick voer v lieden hebbe ende voer die ghene die te Laodicien sijn, ende alle die mijn aensicht niet ghesien en hebben inden vleesche,

+ A

2

dat hen herten mochten vertroost worden onderwesen in die liefde, ende in alle die rijcdommen van die volheyt des verstants, in die kennisse van die verholentheyt Gods des vaders Iesu Christi.

3

Inden welcken sijn alle die scatten der wijsheyt, ende wetenheyt verborghen.

+ 4

Maer dit seg ick, op dat v niemant en verleyde doer hoocheyt der woerden.

5

Want al ben ick metten lichaem van v versceyden, nochtans metten gheest ben ick met v lieden, verblijdende my, ende siende v ordinancie, ende die vasticheyt ws gheloofs welck is in Christo.

6

⁺Daer om ghelijck ghy ontfanghen hebt onsen Heere Iesum Christum, soe wandelt in hem,

+ B

7

ghewortelt ende opghetimmert in hem, ende gheuesticht doert ghelooue, ghelijck ghy oock gheleert hebt. * Ouervloedende in hem met dancsegghinghen.

8

Siet toe dat v niemant en bedrieghe doer Philosophie ende ydel bedroch, nae die leeringhe der menschen, nae die elementen der werelt, ende niet nae Christum.

9

Want in hem woont alle volheyt der Godtheyt lichaemelijck,

10

ende ghy sijt in hem veruult, die daer is thooft van alle ouerheyt ende machticheyt,

11

in den welcken ghy oock besneden sijt met die besnijdenisse niet met handen ghedaen int aflegghen van dat lichaem des vleeschs, in Christus besnijdenisse,

12

met hem begrauen int doopsel, inden welcken ghy oock verresen sijt doert ghelooue van Gods werck, die hem verwect heeft van die dooden.

13

Ende v lieden, doen ghy doot waert in die misdaden ende ombesnedenheyt ws vleeschs, heeft hi mede leuende ghemaect met hem, ⁺vergheuende v allen uwe misdaden,

+ C

14

wt vaghende dat hantscrift der sententien, welck ons teghen was, ende dat selue heeft hy wt dmidden wechghenomen dat vestighende aent cruys,

15

ende beroouende die heerscappien ende machticheden heeft hy die openbaerlijck ghetoont triumpherende van hen in sij seluen.

16

Daer om niemant en ordeele v lieden in spijse oft in dranck, oft in een deel des feestdaechs, oft der nieuwer manen feeste, oft der sabbathen,

17

die een scaduwe sijn der naecomender dinghen, maer het lichaem is in Christo.

18

Niemant en verleyde v lieden al willens doer ootmoedicheyt ende Godts dienst der enghelen int ghene dat hy niet ghesien en heeft wandelende, ⁺te vergheefs opgheblasen doer die wijsheyt sijns vleeschs,

+ D

19

ende niet houdende het hooft, waer af tgheheel lichaem doer aenhancsels, ende voechselen bedient ende ghesticht wast tot eenen wasdom Gods.

20

Eest dan dat ghy ghestoruen sijt met Christo van die elementen deser werelt. Waerom ordeeldi noch als leuende in die werelt?

21

En raket niet, ende en smaket niet, ende en handelet niet,

22

welck alle int ghebruyck verganckelijck sijn, nae die gheboden ende leeringhen der menschen,

23

die welcke sijn hebbende voerwaer eenen schijn der wijsheyt in, valschen Godts dienst ende ootmoedicheyt, ende niet om dlichaem te sparen, niet tot eenigher eeren ter versadinghen des vleeschs.