Den gheheelen Bybel, Inhoudende het oude ende nieuwe Testament (Leuvense bijbel 1548)

Dat ierste Capittel.

1

⁺PAULUS een Apostel Iesu Christi doer den wille Godts, ende Timotheus een broeder,

+ A

2

dien heylighen die te Colossen sijn, ende den gheloouighen broederen in Christo Iesu.

3

Gratie sij v ende vrede van Gode onsen vader, ende onsen Heere Iesu Christo. Wy dancken Gode ende den vader ons Heeren Iesu Christi alijt voer v biddende,

4

Hoorende v ghelooue in Christo Iesu, ende die liefde die ghi hebt tot alle die heyleghen,

5

om die hope die v bewaert wort inden hemel, die ghy ghehoort hebt in twoert der waerheyt, des euangelijs,

6

dwelck tot v lieden ghecomen is, ghelijck dat oock in alle die werelt is, ende het brengt vrucht voerts, ende wast, ghelijck in v lieden, ⁺van dien dach op den welcken ghy ghehoort hebt, ende bekent die gratie Gods inder waerheyt,

+ B

7

ghelijck ghy gheleert hebt van Epaphra onsen alderlieften mede dienaer, die een ghetrouwe dienaer Christi Iesu is voer v lieden,

8

die welcke ons oock heeft verclaert v liefde in den gheest.

9

+ Daer om van dien dach dat wijt ghehoort hebben, en houden wy oock niet op voer v lieden te bidden ende te begheeren, dat ghy veruult moecht worden, met die kennisse van sijnen wille in alderley gheestelijcke wijsheyt ende verstandenisse,

10

op dat ghy moecht wandelen weerdelijck Gode, ouer al behaghende in goede wercken vrucht doende, ende wassende in die kennisse Gods,

11

in alle duecht versterct, nae die machticheyt van sijnder claerheyt, in alle verduldicheyt ende lancmoedicheyt, met blijscap.

* 12

+ Danckende Godt ende den vader, die ons weerdich ghemaect heeft int deel van die erffenisse der heyleghen int licht,

13

die ons verlost heeft wt die macht der duysternissen, ende heeft ons ouerghevoert int rijck vanden sone sijnder liefden,

14

⁺inden welcken wy hebben verlossinghe, vergiffenisse der sonden,

+ C

15

die welcke is het onsienlijck beelt Gods, dierste gheborene van alle creatueren.

16

Want in hem sijn alle dinghen ghemaect in die hemelen ende in die eerde, sienlijcke ende onsienlijcke, tsij die throonen, oft heerscappien, oft ouerheyden, oft crachten, sij sijn al door hem ende in hem ghescapen,

17

ende hy is voer allen, ende alle dinghen bliuen staende in hem.

18

Ende hi is thooft van dlichaem der kercken die welcke is tbeghinsel dierste gheborene wt die dooden om dat hy sijn soude in alle dinghen dierste ouerheyt houdende,

19

want in hem heuet belieft alle die volheyt te woonen,

20

ende doer hem te versoenen alle dinghen in hem, in vrede stellende doer tbloet sijns cruys, tsij die op die eerde oft in die hemelen sijn.

* 21

Ende v lieden doen ghy voertijts waert vervreemt, ende vianden, doer tverstant, in quade wercken,

22

heeft hy nu nochtans versoent int lichaem sijns vleeschs doer die doot, om v te leueren heylich, ende ombesmet, ende omberispelijck voer hem,

23

eest dat ghy nochtans blijft int ghelooue ghe-

[p. *886]

fundeert ghestadich ende omberuerlijck van die hope des Euangelijs dat ghy ghehoort hebt, dat ghepreect is onder alle creatuere, die onder den hemel is. ⁺Van dwelc ic Paulus een dienaer gheworden ben.

+ D

24

Die nu my verblijde int lijden voer v lieden, ende ick veruulle tghene datter ghebreect aen Christus passien in mijn vleesch, voer sijn lichaem dwelck is die kercke.

25

+ Der welcker ick gheworden ben een dienaer, nae Gods bedeylinghe, die my ghegheuen is in v lieden, om dat ick veruullen soude dwoert Gods,

26

die verholentheyt die verborghen is gheweest van die eewen ende gheslachten, maer is nu gheopenbaert sijnen heyleghen,

27

den welcken Godt heeft willen te kennen gheuen die rijcdommen der glorien van dese verholentheyt in die heydenen, welck is Christus, in v lieden die hope der glorien,

28

den welcken wy vercondighen, straffende alle menschen, ende leerende alle menschen in alderley wijsheyt, op dat wy alle menschen volmaect offeren souden in Christo Iesu.

* 29

In den welcken ick arbeyde, strijdende nae sijn werck dat hy werct in my doer die cracht.