Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xvi. Capittel.

1

⁺ICk beuele v lieden Pheben onse suster, die in den dienst is vander kercken die in Cenchris is,

+ A

2

dat ghy haer ontfanct inden Heere alsoe dat den heyleghen betaemt, ende dat ghy haer by staet in wat sake dat sij ws te doen sal hebben. Want sij heefter oock vele by ghestaen, ende my selue oock.

3

Groet Priscam ende Aquilam mijn helpers in Christo Iesu

4

(die voer mijn ziele hen halsen ouerghegheuen hebben, den welcken niet ick alleen en dancke, maer oock alle die kerken inde heydenisse)

5

ende die kercke van haren huysghesin. Groet Epenetum mijnen beminden, die dierste vrucht van Asien is in Christo.

6

Groet Mariam die vele onder ons ghearbeyt heeft.

7

Groet Andronicum ende Iuliam mijn maghen ende mede gheuanghenen, die edel sijn onder die Apostelen, die oock voer my gheweest hebben in Christo.

8

Groet Ampliatum mijnen alderliefsten inden Heere.

9

⁺Groet Vrbanum onsen helper in Christo Iesu ende Stachyn mijnen beminden.

+ B

10

Groet Apellen den beproefden in Christo.

11

Groetse die van Aristobolus huysghesin zijn. Groet Herodionem mijnen maech. Groetse die wt Narcissus huys sijn, die inden Heere sijn.

12

Groet Triphenam ende Triphosam, die inden Heere arbeyden. Groet Persidem mijn alderliefste, die veel ghearbeyt heeft inden Heere.

13

Groet Rufum den wtuercoren inden Heere ende sijn moeder ende die mijne.

14

Groet Asyncritum Phlegontem, Hermam, Patrobam, Hermen, ende die broeders die met hen sijn.

15

Groet Philologum ende Iuliam Nereum ende sijn sustere, ende Olympiadem, ende alle die heylighen die met henlieden sijn.

16

Groet malcanderen met eenen heylighen cusse. V groeten alle die kercken Christi.

+ 17

⁺Ende ick bidde v broeders dat ghy die waerneemt die tweedrachticheden ende argernissen maken buyten die leeringhe die ghy gheleert hebt, ende wijct van die,

+ C

18

want aldusdanighe en dienen Christo onsen Heere niet, maer haren buyck ende doer soete redenen ende benedictien, verleyden sij die herten der onnoselen,

19

want v ghehoorsamheyt is in allen plaetsen vermaert. Daer om verblijde ick my in v lieden. Maer ick wille dat ghy sult wijs sijn int goet, ende simpel int quaet.

20

Ende Godt des vreedts vertrede Sathanam onder v voeten haestelijck. Die gratie ons Heeren Iesu Christi, sij met v lieden.

* 21

Timotheus mijn helper groet v, ende Lucius, ende Iason, ende Sosipater mijn maghen.

22

Ick Tercius groet v, die den brief ghescreuen hebbe, ⁺inden Heere,

+ D

23

Caius mijn weerdt ende alle die kercke groet. V groet Erastus die tresorier der stadt, ende Quartus die broeder.

24

Die gratie ons Heeren Iesu Christi sij met v allen Amen.

25

Ende den ghenen die machtich is v te verstercken nae mijn euangelie, ende die predicatie Iesu Christi, nae die openbaringhe der verborghentheyt, die den voerleden eewighen tijden versweghen is gheweest

26

(dwelck nu gheopenbaert is doer die scriftueren der propheten, nae ghebodt des eewighen Godts, om onderdanich te sijne den ghelooue) onder alle die heydenen bekent

27

Godt die alleen wijs is doer Iesum Christum, den welcken sij eere ende glorie inder eewicheyt. Amen.

Hier voleynt die Epistel van Sinte Pauwels totten Romeynen.