Den gheheelen Bybel, Inhoudende het oude ende nieuwe Testament (Leuvense bijbel 1548)

Dat ierste Capittel.

+ 1

⁺DIE ierste woorden heb ic voor waer ghemaect o Theophile van alle die dinghen die Iesus heeft begonnen te doen, ende te leeren,

+ A

2

tot op den dach dat hy ghebiedende door den heylighen gheest den apostelen die hy vercoren hadde, opghenomen is,

3

Den welcken hy sij seluen oock heeft leuende ghetoont, nae sijn lijden, door veel bewijsinghen veertich daghen lanck henlieden openbarende, ende sprekende van dat rijck Godts,

4

Ende met hen etende heeft hy hen gheboden, dat sij van Ierusalem niet gaen en souden, maer dat sij souden verwachten die belofte des vaders, die welcke ghy (seyt hy) ghehoort hebt door mijnen mont,

5

Want Iohannes heeft voorwaer ghedoopt int water, maer ghy sult ghedoopt worden inden heylighen gheest niet langhe nae desen daghen.

6

Aldus vraechden hem die daer vergadert waren segghende. Heere suldy in deser tijt Israel het rijck wederom gheuen?

7

Ende hy heeft hen gheseyt. ⁺Ten behoort v niet toe te weten die tijden ende stonden, die de vader ghesteldt heeft in sijn macht,

+ B

8

maer ghy sult ontfanghen die cracht des heylighen gheests van bouen op v comende, ende ghy sult my ghetuyghen sijn in Ierusalem, ende in gheheel Iudeen, ende Samarien, ende tot dat wterste van eertrijck,

9

Ende doen hy dit gheseydt hadde, soo is hy (daer sijt saghen) opghehauen, ende een wolcke heeft hem ontfanghen, van haren ooghen,

10

Ende doen sij saghen hem gaende inden hemel, siet soo hebbender twee mannen by hen ghestaen in witte cleederen,

11

die welcke oock gheseydt hebben. Ghy Galileussche mannen wat staet ghy opsiende ten hemelwaert? Dese Iesus die van v lieden opghenomen is inden hemel, sal alsoo comen ghelijc ghy hem hebt ghesien gaende inden hemel.

* 12

Doen sijn sij wederom ghekeert nae Ierusalem, vanden berch die ghenoemt wort van Oliueten, die by Ierusalem is hebbende eens sabboths dachreyse,

13

Ende als sij daer binnen waren ghecomen, soo sijn sij gheclommen op een bouen camere, daer sij bleuen Petrus ende Iohannes, Iacobus ende Andreas, Philippus ende Thomas, Bartholomeus ende Matheus, Iacobus Alpheus sone, ende Simon Zelotes, ⁺ende Iudas Iacobus sone,

+ C

14

alle dese waren volherdende eendrachtelijck int bidden, met die vrouwen ende met Maria die moeder Iesu, ende met sijnen broeders.

15

+ In dien daghen Petrus opstaende int midden der broederen, heeft gheseydt (want daer was een scare van menschen tsamen omtrent hondert ende twintich)

16

Ghy mannen broederen. Tis van noode dat die scriftuere volbracht worde, welc die heylighe gheest te voren gheseyt heeft door Dauids mont van Iudas die een leytsman heeft gheweest der gheender die Iesum gheuanghen hebben,

17

die onder ons mede gherekent was, ende heeft ten deel ontfanghen een deel van desen dienst,

18

Ende dese voorwaer heeft beseten eenen acker van den loon der boosheyt, ende verhanghen sijnde is hy int midden gheborsten, ende alle sijn inghewandt is wtghestort,

19

Ende tis kenlijc gheworden alle den ghenen die te Ierusalem woonen, also dat dien acker ghenoemt worde nae hen tale Hacel-dema, dat is den acker des bloets,

20

Want het is ghescreuen int boec der psalmen. Laet hen wooninghe verwoest worden, ende en laet daer niemant sijn diese bewoone, ⁺Ende sijn bisdom laet eenen anderen ontfanghen

+ D

21

Hierom eest van noode datter iemant van desen mannen die met ons vergadert sijn gheweest, binnen alle den tijt dat onder ons in ende wtghegaen is die Heere Iesus

22

beghinnende van Iohannes doopsel, tot opden dach dat hy van ons opghenomen is, een ghetuyghe worde der verrijsenisse met ons,

23

Ende sij hebbender twee ghesteldt Ioseph die ghenoemt worde Barsabas die toeghenaemt wort rechtuerdich, ende Mathiam,

24

Ende biddende hebben sij gheseydt. Ghy Heere die de herten kent van alle menschen, thoont den welcken ghy vercoren hebt van desen tween een,

25

om te ontfanghen die plaetse van desen dienst, ende apostelscap daer Iudas afghetreden is, om dat hy wech gaen soude in sijn plaetse,

26

Ende sij hebben hen loten ghegheuen, ende dlot is gheuallen op Mathias, ende hy is mede ghetelt gheweest met die twaelf apostelen.