Den gheheelen Bybel, Inhoudende het oude ende nieuwe Testament (Leuvense bijbel 1548)

* Dat .xxi. Capittel.

+ 1

⁺DAer nae heeft hem Iesus wederom vertoont aen die zee Tyberiadis, ende hy heeft hem vertoont aldus,

+ A

2

Daer waren te samen Simon Petrus ende Thomas die ghenaemt wort Didimus ende Nathanael die was wt Cana van Galileen, ende Zebedeus sonen, ende twee ander van sijnen discipelen,

3

Simon Petrus seyt hen. Ick gae visschen, Sij segghen hem. Wij comen oock met v, Ende sij sijn wtghegaen ende gheclommen int scip, ende op dien nacht en hebben sij niet gheuanghen,

4

Maer doent morghenstont was gheworden, stont Iesus op den oeuer, Maer die discipelen en hebben nochtans niet gheweten dattet Iesus is,

5

Hierom seyt Iesus tot hen. Kinderen en hebdi gheen toespijse? Sij hebben hem gheantwoort. Neen,

6

Hy seyt tot henlieden. Worpt het net aen die rechte sijde des sceeps, ende ghy sullet vinden. Aldus hebben sijt wtgheworpen, ende nv en consten sij dat niet ghetrecken om die menichte der visschen,

7

Hierom heeft die discipel den welcken Iesus beminde gheseyt tot Petrus. ⁺Het is die Heere, Doen Simon Petrus ghehoort hadde dat die Heere was, soo heeft hy hem met sijnen rock omgort (want hy was naect) ende heeft hem seluen in die zee gheworpen,

+ B

8

Maer die ander discipelen sijn metten scepe ghecomen (want si en waren niet verre vander eerden, maer by nae twee hondert cubitus) treckende het net der visschen,

9

Als sij dan neder ghecomen waren opt landt, soo hebben sij daer berrende colen ghesien ligghen, ende eenen visch daer op gheleydt, ende broot

10

Iesus seyt tot hen. Brengt hier vanden visschen die ghy nv gheuanghen hebt,

11

Simon Petrus is opgheclommen, ende hy heeft dat net op dlant ghetrocken vol grooter visschen, hondert ende drijenvijftich, Ende al wasser soo veel, soo en is het net nochtans niet ghescoert,

12

Iesus seyt tot hen. Coemt, eedt den noenmael, ende niemant vanden ghenen die daer saten en dorste hem vraghen. Wie sijt ghy? Wetende dat die Heere was,

13

Ende Iesus is ghecomen, ende neemt het broot, ende gheuet henlieden, ende den visch desghelijcs,

14

Dit is nv die derde reyse dat Iesus vertoont is gheweest sijnen discipelen nae dat hy van die dooden verresen was.

* 15

⁺Aldus doen sij den noenmael gheten hadden, + seyt Iesus Simoni Petro. Simon Iohannis hebdi my lief meer dan dese? Hy seyt hem. Ia ick Heere ghy weet wel dat ick v liefhebbe, Hy seyt hem. Voedt mijn lammeren,

+ C

16

Hy seyt hem wederom. Simon Iohannis sone hebdy my lief? Hy seyde hem. Ia ick Heere, ghy weet wel dat ick v lief hebbe, Hy seydt hem. Voedt mijn lammeren,

17

Hy seyt hem ten derdenmael. Simon Iohannes sone, hebdi my lief? Petrus worde bedroeft om dat hy hem ten derdenmale seyde. Hebdi my lief? Ende hy heeft hem gheseydt. Heere ghy weet alle dinghen, ghy weet dat ick v lief hebbe, Hy seyt hem. Voedt mijn scapen.

18

Voorwaer voorwaer ick segghe v, doen ghy iongher waert doen scorste ghy v, ende wandeldet daer ghy wilde, maer als ghy sult oudt gheworden sijn, soo suldy v handen wtstrecken, ende een ander sal v schorten ende v leyden daer ghy niet en wilt,

19

Ende dit heeft hy gheseyt te kennen gheuende, met wat doot dat hy God soude verclaren, Ende doen hy dat gheseydt hadde, soo seydt hy tot hem. Volcht my nae,

20

⁺Ende Petrus omghekeert sijnde heeft ghesien dien discipel die Iesus beminde volghende, die welcke oock inden auontmael gherust heeft op sijn borst, ende seyde. Heere wie eest die v verraden sal?

+ D

21

Als Petrus desen dan ghesien hadde, soo seydt hy tot Iesus. Heere, Maer wat sal dese?

22

Iesus seyt tot hem. Ick wil dat hy soo blijue tot dat ick come, wat leyt v daer aen? volcht ghy my,

23

Hierom is dit woort

[p. *831]

wtghegaen onder die broeders dat dese discipel niet en sterft, Ende Iesus en heeft hem niet gheseyt. Hy en sterft niet, Maer ick wil dat hy soo blijue tot dat ick come, wat leyt v daer aen?

24

Dit is die discipel die ghetuigenis gheeft van desen, ende die dit ghescreuen heeft, ende wij weten dat sijn ghetuygenis warachtich is,

25

Maer daer sijn noch veel ander dinghen die Iesus ghedaen heeft, die welcke waert datmense screef elck besonder, soo meyn ick dat die werelt niet en soude connen begrijpen die boecken diemen scrijuen soude.

* Hier voleynt sint Ians Euangelie.