Den gheheelen Bybel, Inhoudende het oude ende nieuwe Testament (Leuvense bijbel 1548)

Dat ierste Capittel.

1

⁺DIE broeders die Ioden die te Ierusalem sijn ende die int Ioetsche lantscap sijn ontbieden den broeders den Ioden die in Egipten sijn salicheyt, ende goeden vrede.

+ A

2

Wel moet v God doen ende hy si ghedachtich sijns testaments dat hy ghesproken heeft tot Abraham, ende Isaac, ende Iacob sijn ghetrouwe knechten,

3

ende dat hy alle gheue een herte om hem te dienen, ende sijnen wille te doen met een groot herte ende ghewillighen moede.

4

Hy opene v lieder herte in sijn wet, ende in sijn gheboden, ende hy maket vrede.

5

Hy verhoorde uwe ghebeden, ende worde v lieden versoent, noch hy en verlate v niet inden quaden tijt.

6

Ende nv zijn wij hier biddende voor v lieden.

7

Als Demetrius regneerde, int hondertste ende neghenentsestichste iaer, ⁺hebben wij Ioden tot v lieden ghescreuen in die tribulacie ende den oploop die ons ouer ghecomen is in dese iaren, van dat Iason wech gheghaen was van theylich lant, ende van trijck.

+ B

8

Sij hebben die poorten verbrant, ende het onnoosel bloet wtghestort. Ende wij hebben totten Heere ghebeden, ende wij sijn verhoort gheweest, ende wij hebben sacrificie gheoffert, ende terwen bloeme, ende wij hebben die lampen ontsteken, ende die brooden voortghestelt.

9

Ende nv houdt ghestadelijc die daghen des hoochtijts van die loouertenten, der maent Casleu,

10

Int hondertste ende achtentachtentichste iaer, het volck dat te Ierusalem is, ende int Ioetsche lant, ende den raet ende Iudas wenschen Aristobolo den meestere Ptolomei des conincs, die van den gheslachte der ghesalfder priesteren is, ende den Ioden die in Egipten sijn salicheyt ende ghesontheyt.

11

Wij wt grooten perikelen van Gode verlost dancken selue grootelijc, als die teghen alsulcken coninc ghestreden hebben,

12

⁺want hy heeftse doen wtcrielen van Persen die ghestreden hebben teghen ons, ende teghen die heylige stadt,

+ C

13

Want als die capeteyn selue in Persen was, ende met hem een ontellijc heyr, soo is hi gheuallen inden tempel Nanee der affgoddinnen bedroghen sijnde door den raet der priesters van Nanee,

14

Want Antiochus, om met haer te woonen, is tot die plaetse ghecomen met sijnen vrinden, ende om dat hy veel ghelts ontfanghen soude onder den naem van een bruyt ghifte.

15

Ende als die priesters van Nanee dat ghelt voortghestelt hadden, ende dat hy met luttel vrinden ghegaen was binnen het beuanck des tempels, soo hebben sij den tempel ghesloten

16

als Antiochus daer binnen was, ende doen sij eenen heymelijcken inganck des tempels open ghedaen hadden, soo hebben sij steenen werpende den prince ghedoot, ende alle die met hem waren, ende sij hebbense ghedeelt van lede te lede, ende als sij hen hoofden afghehouwen hadden, ⁺soo hebben sij die buyten gheworpen.

+ D

17

Ouer al sij Godt ghebenedijt, die de ongoddelijcke gheleuert heeft.

18

Aldus want wi die suyueringhe des tempels doen sullen opden vijuenentwintichsten dach der maent Casleu, so heuet ons nootelijc ghedocht v lieden dit te ont-

[p. *742]

bieden, op dat ghy oock soudt houden den dach der loouertenten, ende den dach des viers die ghegheuen is als Nehemias (nae dat den tempel ende den outaer opgetimmert was) sacrificien gheoffert heeft.

19

Want doen onse vaderen in Persen gheleydt worden, hebben die priesters die doen Godts dienaers waren, dat vier dat sy vanden outaer ghenomen hadden, heymelijck verborghen in die valleye, daer eenen diepen ende drooghen put was, ende daer in hebben sy dat behoedelijck gheleydt, alsoo dat die plaetse alle menschen ombekent was.

20

⁺Maer doen daer veel iaren voorby waren gheleden, ende dat Gode beliefde dat Nehemias soude ghesonden worden van den coninc van Persen, soo heeft hy die kints kinderen van die priesteren die tvier gheborgen hadden ghesonden om dat vier te soecken, ende ghelijck sy ons vertelt hebben, so en hebben sy gheen vier vonden, maer dick water.

+ E

21

Ende hy heeft hen gheboden dat sijt wtputten souden, ende tot hem brengen ende die sacrificien die daer opgheleydt waren heeft Nehemias die priester doen besprenghen met dat selue water, ende die houten, ende datter op gheleyt was,

22

Ende als dat ghedaen is gheweest, ende dat den tijt daer was, dat die sonne claer scheen, die te voren onder eenen neuel was, soo isser een groot vier ontsteken, alsoo dat sij alle hen verwonderden,

23

Maer alle die priesters baden tot dat het sacrificie volbracht was, Ionathas beghinnende ende die andere antwoordende.

24

⁺Ende Nehemias ghebedt was dese maniere inhoudende. Heere Godt schepper van alle dinghen, veruaerlijck, ende sterck, rechtuerdich, ende bermhertich, die alleen sijt een goet coninck,

+ F

25

alleen vergheuende, alleen rechtuerdich, ende almachtich, ende eewich die Israel verlost van alle quaet, die de vaderen wtuercoren ghemaect hebt, ende hebtse gheheylicht,

26

ontfanct het sacrificie voor alle v volck van Israel, ende bewaert v deel ende heylicht dat.

27

Vergadert onse verstroeytheyt, verlostse die den Heydenen dienen, ende aensiet die versmaedde ende verfoeydde, op dat die Heydenen weten moghen dat ghy onse Godt sijt.

28

Pijnichtse die ons verdrucken, ende versmaetheyt aen doen met hoouerdie.

29

Stelt v volck in uwe heylighe plaetse, alsoo Moyses gheseyt heeft.

30

Ende die priesters songhen loffsanghen tot dat het sacrificie verslint was.

31

⁺Ende doen het sacrificie verteert was, soo heeft Nehemias gheboden datmen van dat ouer ghebleuen water die grootste steenen soude beghieten.

+ G

32

Dwelck als ghedaen was, soo isser een vlamme daer wt ontsteken, maer oock vanden lichte dat vanden outaer wederscheen werde die vlamme verteert.

33

Maer doen dit dinck openbaer is gheworden, soo ist den coninck van Persen ghebootscapt datter water ghesien is gheweest ter plaetsen daer die priesters die ouer gheuoert waren het vier gheborghen hadden, waer mede Nehemias ende die met hem waren die sacrificien ghesuyuert hebben.

34

Maer die coninck aenmerckende ende die sake neerstelijck ondersoeckende, heeft hier eenen tempel ghemaect, op dat hy ondersoecken soude datter gheschiet was,

35

ende als hijt ondersocht hadde, soo heeft hy den priesteren veel goets ghegheuen, ende andere ghiften, ende nemende die met sijn hant gaf hijt hen.

36

Ende Nehemias heeft dese plaetse ghenoemt Nephthar, dwelck bediet suyueringhe. Maer het wordt ghenoemt by vele menschen Nephi.