Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xvi. Capittel

1

⁺ENde Iohannes is op ghetrocken van Gazaris, ende heeft Simoni sijnen vader ghebootscapt wat Cendebeus ghedaen hadde in hen volck.

+ A

2

Ende Simon heeft gheroepen sijn twee outste sonen, Iudam ende Iohannem, ende hy heeft hen gheseydt. Ick ende mijn broederen ende mijns vaders huys hebben Israels vianden bestreden van die ioncheyt tot op desen dach toe, ende het is voorspoedich gheweest in onse handen, dat wij Israel somtijts verlosten,

3

Ende nv ben ick oudt gheworden, maer weest in mijn stede, ende in mijns broeders stede, ende wtgaende strijdt voor ons volc, maer die helpe wten hemel sij met v lieden.

4

Ende hy heeft wt den lantscappe ghecoren twintich duysent orloochscher mannen, ende rosvolck, ende sij sijn ghetrocken tot Cendebeum, ende sij hebben gheslapen in Modin.

5

Ende si hebben des morghens op ghestaen, ende sijn wech ghegaen te velde Ende siet daer quam een groot heyr van rosuolc, ende voetuolck quam hem te ghemoete, ende een scietende riuiere was int midden van henlieden.

6

Ende hy heeft die heyren aenghebracht teghen hen aensicht, hy ende sijn volc, ende hy heeft ghesien dat het volck hem ontsach ouer die riuiere te varen, ⁺ende hy isser dierste ouer gheuaren, ende die mannen hebben hem ghesien, ende sij sijn nae hem ouer gheuaren,

+ B

7

Ende hy heeft het volck ghescheyden, ende dat rosuolck int midden van tvoetuolck, ende het rosuolck der vianden was wtermaten seer vele.

8

Ende sij hebben groot gheluyt ghemaect met die heylighe trompetten, ende Cendebeus is ter vlucht ghekeert, ende zijn heyren, ende van henlieden isser vele ghewont gheuallen, maer die daer ouer bleuen waren, sijn gheuloden in die stercten.

[p. *741]

9

Doen is Iudas Iohannis broeder ghewont gheweest, maer Iohannes heeftse veruolcht tot dat hy quam tot Cendronem die hy op ghetimmert hadde

10

ende sij sijn gheuloden tot die torren die in die velden van Azoten waren, ende hy heeft die metten viere verbrant, ende daer isser van dien gheuallen twee duysent mannen, ende hy is weder ghekeert in Iudeen met vrede,

11

ende Ptolomeus die sone Abobi was capeteyn ghemaect int velt van Iericho, ende hy hadde veel siluers ende gouts,

12

want hy was des opperste priesters behoude sone.

13

Ende sijn herte is opghehauen gheweest, ende hy heeft dat lantschap willen crijghen, ende hy heeft bedroch ghedacht teghen Simon ende sijn sonen dat hyse dooden soude.

14

Ende Simon doorwandelde die steden die int lantscap van Iudeen waren, ende sorghe draghende van die, ⁺is neder ghecomen in Iericho, hy ende Mathathias sijn sone, ende Iudas, int hondertste ende seuenentseuentichste iaer, in die elfste maent, dit is die maent Sabath.

+ C

15

Ende die sone Abobi heeftse ontfanghen in een sterc casteelken, dat ghenoemt wort Doch, met bedroch, welck casteelken hy ghetimmert hadde, ende hy heeft hen eenen grooten maeltijt ghedaen, ende hy heeft daer mannen gheborghen

16

Ende als Simon ende sijn sonen droncken waren gheworden, soo is Ptolomeus op ghestaen met die sijne, ende sij hebben hen wapenen ghenomen, ende sij sijn in die eedtplaetse ghecomen, ende hebben hem ghedoodt, ende sijn twee sonen, ende sommighe van sijnen knechten,

17

ende hy heeft een groot bedroch ghedaen in Israel, ende hy heeft quaet voor goet vergouden.

18

Ende Ptolomeus heeft dit ghescreuen ende ghesonden den coninc dat hy hem een heyr ter helpe senden soude, ende dat hy soude hem het lantscap leueren, ende hen steden, ende die tribuyten.

19

⁺Ende hy heefter andere ghesonden in Gazaram om Iohannem te dooden, ende den duysenste mannen heeft hy brieuen ghesonden dat sij tot hem comen souden, ende hy soude hen gheuen siluer ende gout ende ghiften.

+ D

20

Ende hy heefter andere ghesonden om Ierusalem in te nemen, ende den berch des tempels.

21

Ende een voorloopende heuet Iohanni ghebootscapt in Gazara, dat sijn vader doot was ende sijn broederen, ende dat hy ooc ghesonden hadde datmen v dooden soude.

22

Ende doen hijt ghehoort heeft soo is hy seer verscrict gheweest, ende hy heeft die mannen ghegrepen die ghecomen waren om hem te dooden, ende hy heeftse ghedoodt, want hy heuet vernomen, dat sij sochten hem te dooden.

23

Ende het andere van Iohannis woorden, ende van sijnen strijden, ende van sijn goede crachtighe wercken, waer mede hy vromelijck ghedaen heeft, ende van die timmeragie der mueren die hy op ghetimmert heeft, ende der dinghen die hy ghedaen heeft,

24

siet dese sijn ghescreuen inden boec der daghen van sijn priesterscap van dat hy prince der priesteren ghemaect is gheweest, nae sijnen vadere.

Hier voleyndt den iersten boeck der Machabeen.