Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .ij. Capittel.

1

⁺IN den vierentwintichsten dach der maent in die seste maent, int tweede iaer Darij des conincs,

+ A

2

in die seuenste maent, den eenentwintichsten dach der maent, is dwoort des Heeren gheschiet in die hant Aggei des propheets segghende.

3

Spreect tot Zorobabel Salathiels sone, den prince van Iuda, ende tot Iesum Iosedecs sone den grooten priester, ende tot die andere vanden volcke segghende.

4

Wie isser onder v lieden ouer bleuen, die dit huys ghesien heeft in zijn ierste glorie? ende wat siet ghy dit nv? en is dit alsoo niet recht oft niet en ware in v lieder ooghen?

5

Ende nv wort versterct Zorobabel, seydt die Heere, ende weest versterct Iesu sone van Iosedec groote priester, ende wert versterct alle tvolck der eerden, seyt die Heere der heyrscaren, ende maket (want ick ben met v lieden, seyt die Heere der heyrscaren)

6

het woort dat ick met v lieden vast ghemaect hebbe doen ghi wten landen van Egipten ghinct, ende mijnen gheest sal int midden van v lieden wesen, ⁺ en wilt niet vreesen,

+ B

7

want dit seyt die Heere der heyrscaren. Het is noch een luttelken tijts, ende ick sal hemel ende eerden beroeren, ende die zee, ende het drooghe lant

8

ende ick sal alle die Heydenen beroeren. Ende die van allen volcken begheert is sal comen, ende ic sal dit huys met glorie veruullen, seyt die Heere der heyrscaren.

9

Mijne is tsiluer, ende mijne ist tgout, seydt die Heere der heyrscaren,

10

want die glorie van desen laetsten huyse sal meerder wesen dan des ierste, seydt die Heere der heyrscaren, ende in dese plaetse sal ick vrede gheuen seyt die Heere der heyrscaren.

11

In den vierentwintichsten dach vander neghenster maent, int tweede iaer Darij des conincs is het woort des Heeren ghesciet tot Aggeum den propheet segghende.

12

Dit seydt die Heere der heyrscaren. ⁺Vraecht van die priesters die wet seggende.

+ C

13

Ist dat een mensch gheheylicht vleesch draecht in die slippe van sijnen cleede, ende dat hy met dat opperste van die raecte broot, oft toespijse, oft wijn, oft olie, oft eenigherande spijse, salt gheheylicht worden? Ende die priesters antwoordende hebben gheseyt. Neent?

14

Ende Aggeus heeft gheseyt. Ist dat iemant die besmet is in een ziele iet van desen raect salt besmet worden? Ende die priesters hebben gheantwoort ende geseyt. Het sal besmet worden.

15

Ende Aggeus heeft gheantwoort ende gheseyt. Alsoo is dit volck, ende alsoo is dit gheslachte voor mijn aensicht, seyt die Heere, ende alsoo is alle dwerc van haren handen, ende alle die dinghen die sij daer gheoffert hebben sullen besmet sijn.

16

Ende nv stelt v herten van desen dach ende daer te voren eer den eenen steen opden anderen steen gheleyt werde in des Heeren huys.

17

Als ghi ghinct totten hoop van twintich mudden, ende het worden thiene, ende dat

[p. *711]

ghy ghinct binnen totter perssen, dat ghy daer vijftich flesschen soudt wt perssen, ⁺ende het worden twintich

+ D

18

Ick heb v gheslaghen met eenen berrenden wint, ende met die versengtheyt, ende metten haghel alle die wercken uwer handen, ende daer en was niemant onder v lieden die wederom tot mi keerde, seyt die Heere.

19

Stelt v herten van desen daghe, ende hier naemaels vanden vierentwintichsten dach der neghenster maent, vanden dach dat die fundamenten gheleyt sijn vanden tempel des Heeren, settet op v herte.

20

Is het saet nv in die spruyten? ende hebben den wijngaert, ende den vijgheboom, ende den granaet appelboom, ende den olijfboom al nv ghebloeyt? Van desen dach aen sal ict gebenedijden,

21

Ende des Heeren woort is ten tweeden mael tot Aggeum ghesciet, opden vierentwintichsten dach segghende.

22

Spreect tot Zorobabel den prince van Iuda, segghende. Ick sal den hemel tsamen metter eerden beroeren.

23

Ende ick sal den stoel der conincrijcken omworpen, ende ick sal vernielen die stercheyt vander Heydenen rijcke, ende ick sal den waghen omworpen ende sijnen beclimmer, ende die peerden sullen nederdalen, ende hen beclimmers, die man in sijns broeders sweert.

24

In dien dach, seyt die Heere der heyrscaren, sal ick v tot my nemen Zorobabel Salathiels sone mijn knecht, seyt die Heere, ende ick sal v stellen als eenen seghel, want ick heb v vercoren, seyt die Heere der heyrscaren.

Hier voleyndt die Propheet Aggeus.