Den gheheelen Bybel, Inhoudende het oude ende nieuwe Testament (Leuvense bijbel 1548)

Dat ierste Capittel.

1

⁺INT tweede iaer Darij des conincs, in die seste maent inden iersten dach der maent, is het woort des Heeren ghesciet in die hant Aggei des propheets tot Zorobabel Salathiels sone, den prince van Iuda, ende tot Iesum Ioseders sone den grooten priester segghende.

+ A

2

Dit seyt die Heere der heyrscaren segghende. Dit volc seyt. Den tijt en is noch niet comen om des Heeren huys te timmeren.

3

Ende des Heeren woort is ghesciet in die hant Aggei des propheets seggende. Dit seyt die Heere der heyrscaren seggende. ⁺Dit volc seyt. Den tijt van des Heeren huys te timmeren en is noch niet comen, ende het woort des Heeren is ghesciet in die hant des propheets Aggei seggende.

+ B

4

Ist dan v lieden tijt dat ghy soudt woonen in ghewelfde huysen, ende dat dit huys soude verwoest sijn?

5

Ende nv dit seyt die Heere der heyrscharen. Stelt v herten op v weghen.

6

Ghi hebt vele ghesaeyt, ende luttel inghebracht, ghy hebt gheten ende ghy en sijt niet versaedt, ghy hebt ghedroncken, ende ghy en zijt niet droncken gheworden, ghi hebt v ghedect, ende ghi en sijt niet werm gheworden, ende die loonen vergadert heeft, die heeftse gheworpen in een doorgaette borse.

7

Dit seyt die Heere de heyrscaren. ⁺Stelt v herten op v weghen,

+ C

8

climt opden berch draecht houten, ende timmert dat huys, ende het sal my aenghenaem zijn, ende ic sal gheglorificeert worden, seyt die Heere.

9

Ghy hebt ghesien tot meer, ende siet het is min gheworden, ende ghi hebbet int huys ghebracht, ende ick hebt wtgheblasen, om wat sake seyt die Heere der heyrscaren? Want mijn huys is verwoest, ende ghi haest v een ieghelijc tot sijnen huyse.

10

Daerom zijn die hemelen ouer v lieden verboden dat sij gheenen dauw gheuen en souden, ende die eerde is verboden dat sij haer groeytsel niet gheuen en soude,

11

ende ick heb die droochte op deerde gheroepen ende op die berghen, ende op die tarwe, ende op den wijn, ⁺ende op die olie, ende al dat die eerde voortsbrengt, ende op die menschen, ende op die beesten, ende op alle den arbeydt der handen.

+ D

12

Ende Zorobabel Salathiels sone, ende Iesus Iosedecs sone die groote priester, ende alle die bleuelinghen des volcs hebben ghehoort die stemme haers Gods, ende die woorden Aggei des propheets, ghelijc die Heere hen Godt hem ghesonden heeft tot henlieden, ende tvolck heeft gheureest van des Heeren aensicht,

13

Ende Aggeus des Heeren bode van des Heeren boden heeft den volcke gheseyt segghende. Ic ben met v lieden, seyt die Heere.

14

Ende die Heere heeft verwect den gheest van Zorobabel Salathiels sone des princes van Iuda, ende den gheest van Iesus Iosedecs sone den grooten priester, ende den gheest der andere van alle den volcke, ende sij sijn binnen in ghegaen, ende sij maecten dwerck int huys des Heeren der heyrscaren haers Godts.