Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xiiij. Capittel.

1

⁺ENde Daniel was des conincs tafel ghenoot ende gheeert bouen alle zijn vrinden.

+ A

2

Ende daer was eenen affgodt by die van Babilonien Bel ghenoemt, ende daer aen werden verdaen tot elcken daghe twaelf vaten bloem van meel, ende veertich scapen, ende ses groote cruycken wijns,

3

Ende die coninck diende oock dien, ende hi ghinc alle daghe dien aenbidden, maer Daniel aenbadt sijnen Godt. Ende die coninck heeft tot hem gheseyt. Waerom en aenbidt ghi Bel niet?

4

Die welcke heeft antwoordende hem gheseyt. Want ic en aenbidde die affgoden niet die met handen ghemaect zijn, maer den leuenden God die ghescapen heeft hemel ende eerde, ende macht heeft van alle vleesche.

5

Ende die coninck heeft tot hem gheseyt. ⁺En dunct v niet dat Bel een leuende godt is? en siedi niet hoe veel dat hi eedt ende drinct alle daghe?

+ B

6

Ende Daniel hem toelacchende heeft gheseyt. Coninc en wilt niet dolen, want dese is binnen van eerden, ende buyten van metael, ende hy en heeft noeyt gheten,

7

ende die coninck gram wesende heeft zijn priesters gheroepen, ende tot hen gheseyt. Ten si dat ghy my segghet, wie dat is die dese costen etet so suldi steruen,

8

Maer ist dat ghy my thoont dat Bel dese dinghen etet, soo sal Daniel steruen, want hy heeft gheblasphemeert teghen Bel. Ende Daniel heeft totten coninck gheseyt. Het ghesciede nae v woort.

9

Ende die priesters van Bel waren tseuentich, sonder die huysvrouwen ende die cleyn kinderen ende die sonen. Ende die coninc is met Daniel ghecomen in Bels tempel,

10

Ende Bels priesters hebben gheseyt. Siet wij gaen buyten wt, ende ghi coninc stelt die spijsen, ende mengt den wijn, ende sluyt die doere ende teekent die met uwen rinck,

11

ende als ghy binnen ghecomen sult zijn morghen vroech, ten sij dat ghijt al vint gheten van Bel, soo sullen wi die doot steruen oft Daniel die teghen ons gheloghen heeft.

12

Ende si en achtens niet, want sij hadden onder die tafele eenen heymelijcken verborghen inganc ghemaect, ende door dien ghinghen si altijt inne, ende sij verslinden die dinghen.

13

Aldus ist gheschiet nae dat si wt gheghaen waren, ende die coninck die spijsen ghestelt heeft voor Bel, dat Daniel sijnen knechten beuolen heeft, ⁺ende si hebben asschen ghebrocht, ende hy heeft die ghesift den heelen tempel door, voor den coninck, ende wt ghegaen sijnde hebben si die doeren ghesloten, ende beseghelende die met des conincs rinck sijn si wech gheghaen.

+ C

14

Ende die priesters zijn des nachts daer inghegaen nae hen ghewoonte, ende hen huysvrouwen ende hen kinderen, ende sij hebbent al gheten ende ghedroncken.

15

Ende die coninc is opghestaen inden iersten dagheraet ende Daniel met hem.

16

Ende die coninc heeft gheseyt. Sijn die seghelen oock gansch gheheel Daniel? Die welke heeft gheantwoort. Sij zijn gansch gheheel o coninck.

17

Ende ter stont als hi die doere open ghedaen heeft, soo heeft die coninc die tafel aensiende gheroepen met luyder stemmen. Bel ghy zijn groot, ende by v en is gheen bedroch.

18

⁺Ende Daniel heeft ghelacchen, ende den coninck ghehouden dat hy daer binnen niet gaen en soude, ende hy heeft geseyt. Siet het paueytsel, aenmerct wiens voetstappen dat dit zijn.

+ D

19

Ende die coninck heeft gheseydt, ick sie hier voetstappen van mannen ende vrouwen, ende cleynder kinderen Ende die coninck is gram gheworden.

20

Doen heeft hy die priesters ghegrepen, ende hen huysvrouwen ende kinderen, ende si hebben hem ghetoont die verborghen heymelijcke doorkens, waer door dat si in quamen, ende verteerden datter op die tafel was.

21

Hierom heeftse die coninc ghedoodt, ende hy heeft Bel in Daniels macht gheleuert, die welcke heeft hem omgheworpen ende sijnen tempel.

22

Ende daer was eenen grooten

[p. *688]

draeck in die plaetse, ende die van Babilonien eerden hem.

23

⁺Ende die coninck heeft tot Daniel gheseyt. Siet ghy en moecht nv niet segghen, dat dit gheenen leuende godt en is, daerom aenbidt hem.

+ E

24

Ende Daniel heeft gheseyt, ick aenbidde den Heere mijnen Godt, want hy is een leuende God,

25

maer ghy coninc gheeft my die macht, ende ick sal den draec dooden sonder sweert oft stock. Ende die coninc heeft gheseyt. Ick gheefse v

26

Hierop heeft Daniel ghehaelt peck ende smeer, ende hair ende hy heeft die tsamen ghesoden, ende hy heeft daer clonten af ghemaect, ende heeftse ghegheuen in des draecs muyl, ende den draec is gheborsten. Ende hy heeft gheseyt. Siet den ghenen die ghy eerdet,

27

Het welc als die van Babilonien ghehoort hebben, soo sijn sij seer verbolghen gheweest, ende teghen den coninc vergadert sijnde hebben si gheseyt. Die coninc is een Iode gheworden, Hi heeft Bel verdoruen ende den draec ghedoot, ende die priesters verslaghen.

28

Ende sij hebben gheseyt als sij tot den coninck ghecomen waren. ⁺Levert ons Danielem, oft anders sullen wij v dooden, ende v huys.

+ F

29

Aldus heeft die coninc ghesien dat si hem crachtelijck oueruielen, ende midts noot bedwonghen sijnde heeft hy hen Danielem gheleuert.

30

Die welcke hebben hem gheworpen inden cuyl der leeuwen, ende hy was daer ses daghen.

31

Ende inden cuyl waren seven leeuwen, ende hen werden daghelijcs twee lichamen ghegheuen, ende twee scapen, ende doen en sijnse hen niet ghegheuen, op dat si Danielem verslinden souden.

32

Ende Habacuc was een propheet in Iudeen, ende hy hadde een pottagie ghecoect, ende hy hadde broot ghebroct in een potteken, ende ghinck te veldewaerts dat hijt sijnen maeyers draghen soude.

33

Ende die enghel des Heeren heeft tot Habacuc geseyt. Draecht die noenspijse die ghy hebt in Babilonien Danieli, die inder leeuwen cuyl is.

34

Ende Habacuc heeft gheseyt. Heere ick en heb Babilonien niet ghesien, ende den cuyl en ken ick niet.

35

⁺Ende die enghel des Heeren heeft hem ghegrepen met den top sijns hoofts, ende heeft hem ghedraghen metten haire sijns hoofts, ende heeft hem in Babilonien ghestelt opden cuyl int ghewelt sijns gheests.

+ G

36

Ende Habacuc heeft gheroepen seggende, Daniel neemt die noenspijse die v God ghesonden heeft.

37

Ende Daniel seyde. God ghy hebt mijns ghedachtich gheweest, ende ghy en hebtse niet verlaten die v lief hebben.

38

Ende Daniel opstaende heeft ghegeten, Maer die enghel des Heeren heeft Habacuc ter stont wederom ghestelt in sijn plaetse.

39

Hierom is die coninck ghecomen opden seuensten dach, dat hi Danielem beweenen soude, ende hy is totten cuyl ghecomen, ende hy heeft binnen ghesien, ende siet Daniel was daer sittende.

40

Ende die coninck heeft gheroepen met een groote stemme segghende. Groot sij di Heere Daniels Godt. Ende hi heeft hem wtghetrocken.

41

Maer die ghene die de sake van sijnder verderffenisse gheweest hadden heeft hy inden cuyl gheworpen, ende sij werden verslonden in corter stont voor hem.

Hier voleyndt die Propheet Daniel.