Den gheheelen Bybel, Inhoudende het oude ende nieuwe Testament (Leuvense bijbel 1548)

Dat ierste Capittel.

1

⁺INT derde iaer des rijcs van Ioacim den coninck van Iuda is Nabugodonosor die coninck van Babilonien ghecomen in Ierusalem, ende heeft die beleghen.

+ A

2

Ende die Heere heeft in zijn handt gheleuert Ioacim den coninck van Iuda, ende een deel van die vaten des huys Godts, ende hy heeft die wech ghedraghen int lant van Sennaar, in zijns Godts huys, ende die vaten heeft hy ghedraghen int huys van zijns Gods scat.

3

Ende die coninck heeft gheseyt tot Asphenez den ouerste van die ghesneden camerlinghen, dat hy van die kinderen van Israel soude inbrenghen, ende van dat coninclijck saet ende der princen.

4

Kinderen in die welcke gheen smette en ware, schoon van ghedaente, ende gheleert in alle wijsheyt, scalck doer wetenheyt, ende gheleert doer onderwijsinghe, ende die in des conincs Palays soude moghen staen, dat hy hen leeren soude die letteren, ⁺ende die tale der Chaldeen.

+ B

5

Ende die coninck heeft hen haerlieder iaerlijcschen cost ghestelt alle daghen van zijn spijsen, ende vanden wijn daer hy selue aff dronck, op dat sij drij iaren opgheuoedt zijnde, daer na staen souden voer des conincs teghenwoerdicheyt.

6

Aldus hebben onder hen lieden gheweest van die kinderen van Iuda, Daniel, Ananias, Misael, ende Azarias.

7

Ende die ouerste der camerlinghen heeft hen namen inghestelt. Danielem Baltasar, Ananie Sidrach, Misaelen Misach, ende Azarie Abdenago.

8

Maer Daniel heeft in zijn herte een opset ghemaect, dat hy niet en soude besmet worden van des conincs tafele, noch vanden wijne zijns drancs, ende hy heeft den ouerste der camerlinghen ghebeden dat hy niet en soude besmet werden.

9

Ende Godt heeft Daniel die gratie ghegheuen, ende bermherticheyt voer daenschijn vanden prince der camerlinghen.

10

Ende die prince der camerlinghen heeft tot Daniel gheseyt, Ick vreese mijnen heere den coninck die v spijse ende dranck ghestelt heeft. Die welcke, ist dat hy v aensichten siet magherder bouen dander ionghelinghen van uwer ouderdom, ⁺soo suldi mijn hooft voer den coninck verdoemen.

+ C

11

Ende Daniel heeft gheseyt tot Malasar, den welcken die prince der camerlinghen ghestelt hadde ouer Danielem, Ananiam Misaelelem ende Azaram.

12

Proeft ons uwe dienaers (bidde ick) thien daghen, ende datmen ons gheue groue pottagie om teten, ende water om te drincken,

13

ende aenscouwet onse aensichten, ende der kinderen aensichten die met coninclijcke spijse ghevoet worden, ende alsoo ghy sien sult, soo suldi doen met uwen dienaers.

14

Die welcke alsulcke redene ghehoort hebbende heeftse gheproeft thien daghen.

15

Ende nae thien daghen hebben hen aensichten beter ghescenen, ende vol lijuigher, bouen alle die kinderen die met des conincs spijse ghevoedt worden.

16

Maer Malasar nam die spijsen, ende den wijn van haren dranck, ende hy gaff hen groue pottagie.

17

Ende desen kinderen heeft die Heere wetenheyt ghegheuen, ende gheleertheyt in alle boeck, ende in alle wijsheyt. ⁺Ende Danieli heeft hy ghegheuen het verstant van allen visioenen ende droomen.

+ D

18

Aldus doen die daghen ouerleden waren nae die welcke die coninck gheseyt hadde dat mense inbrenghen soude, soo heeftse die ouerste der ghesneder camerlinghen binnen ghebracht in daensicht van Nabugodonosor.

19

Ende doen die coninck tot hen ghesproken hadde, soe en zijnder alsulcke niet gheuonden van allegader, als Daniel, Ananias, Misael, ende Azarias, ende sij hebben in daensicht des conincs ghestaen.

20

Ende alle woert der wijsheyt ende des verstants, dat die coninck van hen ghevraecht heeft, heeft hy in hen gheuonden thien mael bouen alle die waersegghers ende wijse die in alle zijn rijck waren.

21

Ende Daniel heeft gheweest tot het ierste iaer des conincs Cyri.