Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .lxvi. Capittel.

1

DIt seyt die Heere. ⁺Den hemel is mijnen stoel ende die eerde dat banxken mijnder voeten. Wat huys is dit dat ghy my timmeren sult? ende welc is dese plaetse mijnder rusten?

+ A

2

Alle dese dinghen heeft mijn hant ghemaect, ende alle dese dinghen sijn ghemaect, seyt die Heere, maer tot wien sal ick sien, dan totten armen, ende den heel ghebrokenen van gheeste, ende die van mijnen woorden beeft?

3

Die een rundt offert, is als die ghene die eenen man doot slaet die een cleyn vee ten offer slaet, is ghelijk die eenen hont die hersenen wtslaet, die een offerande offert is ghelijc den ghenen die dbloet der swijnen offert, die des wieroocs ghedencket die is ghelijck den ghenen die den affgodt ghebenedijt. ⁺Alle dese dinghen hebben sij vercoren in hen weghen, ende in hen affgrijselijcheden heeft hen ziele ghenoechte ghehadt.

+ B

4

Daer om sal ick oock hen bespottinghen verkiesen, ende dat sij vreesden sal ick hen aenbrenghen, want ick heb gheroepen, ende daer en was niemant die antwoorde ick heb ghesproken, ende sij en hebbens niet ghehoort ende sij hebben quaet ghedaen in mijn ooghen, ende dat ick niet ghewilt en hebbe dat hebben sij vercoren.

5

Hoort des Heeren woort ghy die beeft van sijnen woorde. V broeders die v haten ende verworpen om mijnen naem die hebben gheseyt, die Heere si gheglorificeert, ende wij sullent sien in v blijscap. Maer sij sullen bescaemt worden.

6

⁺Die stemme des volcs van der stadt, die stemme vanden tempel, die stemme des Heeren gheuende sijnen vianden die vergheldinghe,

+ C

7

Eer sij in barens arbeyde was heeft sij ghebaert, ende eer haer baren quam, soo heeft sij een manlijck kint ghebaert.

8

Wie heeft oyt sulcs gehoort? ende wie heeft desghelijck ghesien? Sal die eerde baren op eenen dach, oft sal een volck ghebaert worden te samen, om dat Sion in arbeyts noode gheweest is, ende haer kinderen ghebaert heeft?

9

En sal ick die dandere doen baren, oock selue niet baren, seyt die Heere? sal ick die den anderen vruchtbaerheyt gheue onvruchtbaer wesen, seyt die Heere uwe Godt?

10

Verblijdt v met Ierusalem, ende verhuecht v in haer alle die haer lief hebt verblijdt v met haer ghy alleghader die ouer haer droeuich sijt,

11

dat ghy suyghen moecht, ⁺ende versaedt worden van die borst haerder vertroostinghen dat ghy melcken moecht, ende oueruloeden van weelden van haer volcomen glorie,

+ D

12

Want dit seyt die Heere Siet ick sal op haer affdoen dalen als eenen vloet des vreedts, ende als een oueruloedende beke die glorie der Heydenen, die ghy suyghen sult, ghy sult aen die borsten ghedraghen worden, ende op die knien sullen sij v troetelen.

13

Ghelijck oft iemand van sijn moeder ghetroetelt worde, alsoo sal ick v lieden troosten ende in Ierusalem suldi vertroost worden.

14

Ghy sullet sien ende v herte sal blijde sijn, ende v beenderen sullen ghelijck cruyt wtspruyten, ende die hant Godts sal ghekent worden in sijn dienaers, ⁺ende hy sal verbolghen sijn teghen sijn vianden,

+ E

15

want siet die Heere sal int

[p. *590]

vier comen, ende als eenen storm wint sijn waghenen, om te verghelden met verbolghentheyt sijn rasende gramscap, ende zijn straffinghe in een vlamme des viers,

16

want metten viere sal die Heere ordeelen, ende met zijn sweert tot alle vleesch, ende die ghedoodde vanden Heere sullen vermenighfuldicht worden.

17

Die gheheylicht waren ende hen seluen voor suyuer hielden, in die houen achter die doere van binnen die verckens vleesch aten, ende affgrijselijcheyt ende die muys, die sullen te samen vernielt worden, seydt die Heere.

18

⁺Maer ick come om te vergaderen hen wercken ende hen ghedachten met allen Heydenen ende talen, ende si sullen comen ende mijn glorie sien,

+ F

19

ende ick sal in henlieden een teeken stellen, ende ick salder wt henlieden senden die behouden sullen wesen, tot die heydenen in die zee in Aphriken, ende Lydien scichten houdende, in Italien, ende in Griecken lant, tot die eylanden verre, tot die ghene die van my niet ghehoort en hebben, ende mijn glorie niet ghesien en hebben. Ende si sullen mijn glorie den Heydenen vercondighen,

20

ende si sullen alle v broeders herwaerts brenghen van allen die Heydenen tot een gaue voor den Heere, op peerden ende op waghenen, ende in rosbaren ende op muylen, ende met kerren tot mijnen heylighen berch Ierusalem. Seyt die Heere, ghelijck oft die kinderen van Israhel een ghifte brachten in een suyuer vat in des Heeren huys.

21

⁺Ende ic sal van hen lieden aennemen tot priesters ende Leuiten seyt die Heere,

+ G

22

want ghelijck die nieuwe hemelen ende die nieuwe eerde, die ick doe staen voor my, seyt die Heere, alsoo sal v saet staen, ende uwen naem.

23

Ende die een maent sal wt dander maent wesen, ende den eenen sabboth wt den anderen, alle vleesch sal comen om te aenbidden voor mijn aensicht, seyt die Heere.

24

Ende si sullen wtgaen, ende sien die doode lichamen der mannen die ouer ghetreden hebben teghen my, haren worm en sal niet steruen, ende hen vier en sal niet wtgheblusschet worden ende si sullen wesen tot een versadinghe des ghesichts allen vleessche.

Hier eyndet die propheet Isaias