Den gheheelen Bybel, Inhoudende het oude ende nieuwe Testament (Leuvense bijbel 1548)

Dat ierste Capittel.

1

⁺BEMINT die rechtuerdicheyt ghy die deerde ordeelt.

Gheuoelt vanden Heere in goetheyt ende in simpelheyt des herten soect hem,

+ A

2

want hi wort gheuonden vanden ghenen die hem niet en tempteren, ende hy openbaert hem den ghenen die in hem gheloouen,

3

want verkeerde ghedachten versceyden van Godt, maer die gheproefde duecht berispt die onwijse,

4

want in een quaetwillighe siele en sal die wijsheyt niet comen, noch sij en sal niet woonen in een lichaem dat den sonden onderdanich is.

5

Want den heylighen gheest der onderwijsinghen sal vanden gheueynsden vlieden, ⁺ende hy sal sij seluen aftrecken van die ghedachten die sonder verstant sijn, ende hy sal ghestraeft worden van die ouercomende ongherechticheyt.

+ B

6

Want goedertieren is den gheest der wijsheyt, ende hy en sal den vermalendijden niet verlossen van sijnen lippen, want Godt is sijnder nieren ghetuyghe, ende sijnder herten een warachtich doorsoecker, ende een hoorder sijnder tonghen.

7

Want den gheest des Heeren heeft veruult den omganc der eerden, ende tghene dat alle dinghen onthoudt heeft die wetenheyt der stemmen.

8

Daerom wie ongherechticheden spreect die en mach niet verholen blijuen, noch hem en sal niet voorby gaen dat straffende oordeel,

9

⁺want in die ghedachten vanden ongoddelijcken sal die ondervraghinghe wesen, maer dat ghehoor van sijnen woorden sal tot Godt comen, ter straffinghe sijnder boosheden.

+ C

10

Want die oore der ialoursheit hooret al, ende dat gherucht der murmuratien en sal niet

[p. *517]

verborghen worden.

11

Daerom wacht v van die murmuratie die niet en batet, ende van lasteringhe spaert v tonghe, want een doncker sprake en sal niet te vergheefs gaen, maer eenen mont die liecht doot die siele.

12

En wilt die doot niet neerstlijc begheeren in die dolinghe ws leuens, noch en vercrijght die verderffenisse in die wercken uwer handen niet.

13

⁺Want Godt en heeft die doot niet ghemaect noch hy en verblijdt hem niet in die verderffenisse der leuender,

+ D

14

want hy heeft alle dinghen ghescapen om dat sij wesen souden ende hy heeft die natien vanden omganc der eerden gheneselijck ghemaect, ende in hen en is gheen medicijne der verderffenissn noch der hellen rijck op deerde.

15

Want die rechtuerdicheyt is eewich, ende onsterffelijc

16

maer die ongoddelijcke hebben die verderffenisse met handen ende met woorden tot hen gheroepen, ende meynende dat sij hen vrindinne was, sijn sij veruloten, ende sij hebben beloften tot haer ghesteldt, want sij sijn weerdich dat sij van haerder partien souden wesen.