Den gheheelen Bybel, Inhoudende het oude ende nieuwe Testament (Leuvense bijbel 1548)

Dat ierste Capittel.

1

⁺DIt sijn die woerden Ecclesiastes des soens Dauid des conincs van Ierusalem.

+ A

2

Idelheyt der ydelheden heeft gheseyt Ecclesiastes ydelheyt der ydelheden, ende tes alle ydelheyt.

3

Wat heeft die mensch meer van alle sijnen arbeyt daer hy mede arbeyt onder die sonne?

4

Dat een gheslachte gaet voer by, ende dander gheslachte coemt aen, maer die eerde staet inder eewicheyt.

5

Die sonne staet op, ende gaet onder, ende sy keert weder om tot haer plaetse, ende aldaer weder op comende

6

draeyt sij doort suyden, ende wort ghekeert nae den noorden. Den wint al doerlopende gaet rontsomme, ende coemt wederom in sijn omkeeringhen.

7

⁺Alle vloeden gaen in die zee, ende die zee en vloeyt niet ouer. Tot die plaetse daer die vloeden wtcomen, keeren sij weder om, dat sij wederom vloeyen souden.

+ B

8

Alle dinghen sijn swaer, die mensch en can die niet wtlegghen met woerden. Die ooghe en wort niet versaedt van sien, noch die oore en wort niet veruult van hooren.

9

Wat esser dat gheweest heeft? dat selue dat wesen sal, wat eest datter ghemaect is? dat selue datter ghemaect sal worden.

10

Daer en es niet nieuws onder die sonne, noch niemant en can ghesegghen. Siet dat is nieuwe, want het heeft nu al tevoren gheweest in die tijden die voer ons gheweest hebben.

11

⁺Daer en is gheen ghedenckenisse der voerleder dinghen, noch oock der dinghen die namaels sijn sullen en sal gheen ghedenckenisse wesen, by die ghene die wesen sullen int laetste.

+ C

12

Ick Ecclesiastes heb een coninck van Israel gheweest in Ierusalem,

13

ende ick heb in mijnen sin voerghenomen te soecken, ende te ondervraghen wijselijck van allen dinghen die onder die sonne ghescieden. Dese alderquaetste becommeringhe heeft Godt den kinderen der menschen ghegheuen dat sij hen daer in becommeren souden.

14

Ick heb ghesien alle die dinghen die onder die sonne ghescieden, ende siet het is al ydelheyt, ende pijnlijcheyt des gheests.

15

Die verkeerde sijn quaet om bekeeren, ende der sotten ghetal is sonder eynde.

16

⁺Ick heb in mijn herte ghesproken segghende, Siet ick ben groot gheworden, ende ick heb alle mensche te bouen ghegaen in wijsheyt, die voer my gheweest hebben in Ierusalem, ende mijn verstant heeft veel dinghen wijselijck ghemerct, ende ick heb die gheleert.

+ D

17

Ende ick heb mijn herte daer toe ghegheuen dat ick weten soude voersichticheyt ende leeringhe, ende oock die dolinghen, ende die sotheyt ende ick heb bekent dat hier in oock arbeyt was, ende pijnlijckheyt des gheests,

18

om dat in veel wijsheden veel verbolghentheden is, ende wie wetenheyt vermeerdert die vermeerdert oock den arbeyt.