Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxxi. Capittel.

1

Dit sijn die woerden Lamuels des conincs dat visioen, waer doer hem sijn moeder gheleert heeft.

2

⁺UVat ist mijn beminde? wat ist doch mijns lichaems beminde? wat ist ghy beminde mijnder begheerten?

+ A

3

En gheeft den vrouwen v goeden niet, noch v rijcdommen om die coninghen te vernielen.

4

En wilt den coninghen (O Lamuel) en wilt den coninghen gheenen wijn gheuen, want daer en blijft gheen secreet waer dronckenscap regneert,

5

dat sij bijauontueren niet en drincken, ende vergheten die ordeelen, ende veranderen die sake van die kinderen des armen.

6

Gheeft stercken dranck den droeuighen, ende wijn den ghenen die bitter van herten sijn.

7

laetse drincken ende vergheten haerder ghebreckelijcheyt, ende dat sij haers drucs niet meer en ghedencken.

8

Doet uwen mont open den stomme ende den saken van allen den kinderen die voer by gaen,

9

⁺doet uwen mont open, ondersceyt dat rechuerdich is, ende doet recht den ghebreck lijdende ende den armen.

+ B

10

Aleph. Wie sal een stercke vrouwe vinden? van verre ende vanden wtersten palen is haren prijs.

11

Beth. Haers mans herte heeft op haer betrouwet, ende sij en sal gheen roouen behoeuen.

12

Gimel. Sij sal hem wederghegheuen goet, ende gheen quaet alle die daghen sijns leuens.

[p. *508]

13

⁺Daleth. Sij heeft ghesocht wolle ende vlas, ende sij heeft ghewracht doer den raet van haren handen.

+ C

14

He. Sy is gheworden ghelijck eens coopmans scip, van verre brenghende haer broot.

15

Vau. Ende des nachts is sij opghestaen, ende heeft den roof haren huysghenooten ghegheuen, ende spijse haren dienstvrouwen.

16

Zain. Sy heeft eenen acker ghemerct, ende dien ghecocht, van die vrucht haerder handen heeft sij eenen wijngaert gheplant.

17

Heth. Sy heeft met vromicheyt haer lendenen ghegort, ende haeren arm heeft sij sterck ghemaect.

18

Theth. Sy heeft ghesmaect ende ghesien dat haer hanteringhe goet is, haer lichtvat en sal des nachts niet wtghedaen worden.

19

⁺Iod. Sy heeft haer handen wtghesteken tot stercke dinghen, ende haer vingheren hebben die spille aenveert.

+ D

20

Caph. Haer hant heeft sij gheopent den allendighen, ende haer palmen wtghesteken totten armen.

21

Lamed. Sy en sal voer haer huys niet vreesen van die couwe des sneus, want allen haer huysghenooten sijn ghecleedt met dobbel cleederen.

22

Mem. Een ghestrijpt cleedt heeft sij voer haer seluen ghemaect, fijn wit lijnwaet ende purpur is haer habijt.

23

Nun. Edel is haer man in die poorten, als hy sidt met die raetsheeren des lants.

24

Samech. Lijnwaet heeft sij ghemaect ende vercocht, ende eenen gordel heeft sij den Chananeus gheleuert.

25

Ain. Stercheyt ende scoonheyt is haer cleedt, ende sij sal lachen in den wtersten daghe.

26

⁺Phe. Haren mont heeft sij der wijsheyt open ghedaen, ende die wet der goedertierenheyt es in haer tonghe.

+ E

27

Sade. Sy heeft aenmerct die paden haers huys, ende sij en heeft haer broot niet ledich gheten.

28

Coph. Haer kinderen sijn opghestaen ende hebben haer voer dalder salichste ghepresen, ende haer man heeftse oock gheloeft.

29

Res. Veel dochteren hebben rijcdommen vergadert, maer ghy hebtse alle te bouen ghegaen.

30

Sin. Bedriechelijck is die lieflijcheyt ende ydel is die scoonheit, een vrouwe die Godt vreest die sal ghepresen worden.

31

Thau. Gheeft haer van die vrucht haerder handen ende laet haer wercken in die poorten haer prijsen.

Hier eyndet dat boeck van Salomons parabelen oft ghelijckenissen int Latijn Prouerbia Salomonis ghenaemt.