Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxx. Capittel.

1

⁺DIt sijn die woerden des vergaerders des wtbrakers sone. Het visioen dwelck ghesproken heeft die man metten welcken Godt is, ende die versterct sijnde (als Godt met hem woonde) gheseyt heeft.

+ A

2

Ick ben dalder sotste der mannen ende die wijsheyt der menschen en is met my niet.

3

Ick en heb gheen wijsheyt gheleert, ende ick kenne die wetenheyt der heyleghen.

4

Wie isser opgheclommen ten hemel ende daer aff ghedaelt? wie heeft den wint in sijn handen ghehouden? wie heeft die wateren tsamen ghebonden als in een cleedt? wie heeft opghewect alle die hoecken der aerden? welck is sijnen naem, ende welck is sijns soens naem ist dat ghijt weet?

5

Elck vierich woert Gods is eenen scilt den ghenen die in hem hopen,

6

en doeter niet toe tot sijnen woerden, dat ghy niet ghestraft en wort, ende loghenachtich ghevonden.

7

Twee dinghen heb ick v ghebeden, en weyghert my die niet eer ick sterue.

8

Ydelheyt ende loghen talen maect verre van my.

Armoede ende rijcdom en gheeft my niet, maer gheeft my alleen mijnen nootdurft,

9

⁺dat ick bijauontueren versaet sijnde niet ghetrocken en worde om te loochenen, ende segghe soude. Wie is die Heere? oft dat ick van ghebreckelijcheyt niet ghedwonghen worde om te stelen, ende den naem mijns Godts te versweeren.

+ B

10

En besculdicht den knecht niet by sijnen Heere, dat hy bijauontueren v niet en vermalendijde, ende dat ghy neder valt.

11

Daer is een gheslachte dat sijnen vader vermalendijt, ende sijnder moeder niet en ghebenedijt.

12

Daer is een gheslachte dat hem seluen laet duncken dattet suyuer is, ende nochtans en eest niet ghewasschen van zijn vuylicheyt.

13

Daer is een gheslachte wiens ooghen hooghe sijn, ende wiens oochscelen hooch opdraghende sijn.

14

Daer is een gheslachte dat sweerden heeft voer tanden ende het knouwet met sijnen baectanden, om dat eten soude die ghebreck lijdende vander eerden, ende die arme wt die luyden.

15

Die echele heeft twee dochters segghende, Brengt herwaerts, Brengt herwaerts. ⁺Drij dinghen sijn onuersadelijck, ende tvierde dat nemmermeer en seyt tes ghenoech.

+ C

16

Die helle, ende der vrouwen buyck, ende deerde die niet versaet en wort van water, maer tvier en seyt nemmermeer tis ghenoech.

17

Een ooghe die den vader bespot, ende sijns moeders baringhe versmaet, die moeten die rauen van der beken wt picken, ende die ionghen des Arents moeten die eten.

18

Drij dinghen sijn my swaer, ende tvierde en kenne ic met allen niet.

19

Den wech des arents inden hemel, der slanghen wech op die aerde, eens scips wech int midden der zee, ende eens mans wech in sijn ioncheyt.

20

Sulck is dleuen van een vrouwe die een ouerspeelster is, die eet, ende haren mont vaghende seyt, Ick en heb gheen quaet ghedaen.

21

Doer drij dinghen wort een landt beroert, ende tvierde en cant niet verdraghen.

22

Doer eenen knecht als hy regneert, doer eenen sot als hy van spijse versaet is,

23

Doer een hatelijcke vrouwe als die te houwelijcke ghenomen is, ende doer een dienstvrouwe als sij haerder meesterssen erffgenaem is gheworden.

24

⁺Vier dinghen sijn die minste der eerden, ende die selue sijn wijser dan die wijse,

+ D

25

die mieren een amachtich volck, die haer seluen in den oogst spijse bereyt.

26

Een haesken een onsterck volck, die in die steenrootse sijn rustplaetse maect,

27

die sprinchanen en hebben gheenen coninc, ende sij gaen allegader by hen scaren.

28

Een spinne behelpt haer metten handen, ende sij woont inder coninghen huysen.

29

Drij dinghen sijnder die wel gaen, ende tvierde dat gaet gheluckichlijck,

30

den leuw dalder stercste der beesten en sal hem van niemants ontmoeten veruaeren,

31

eenen haen met opghescorte lendenen, ende eenen ram, ende daer en is gheen coninck die hem wederstaen mach.

32

Ende die sot ghescenen heeft, nae dat hy om hooghe verhauen is, want hadde hijt verstaen soe soude hy sijn hant op sijnen mont gheleydt hebben.

33

Maer wie die borsten sterckelijck druct om melck daer wt te trecken, die druct daer boter wt, ende wie seer crachtelijck wt snuyt die trect bloet wt, ende die gramscappen verwect, die brengt twisten voerts.