Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .x. Capittel.

1

⁺EEn wijse sone verblijt den vader, maer eenen sotten sone is sijns moeders droefheyt.

+ A

2

Die scatten der ongoddelijcheyt en sullen niet helpen, maer die rechtuerdicheyt sal vander doodt verlossen.

3

Die Heere en sal die ziele van eenen rechtuerdighen met hongher niet pijnighen, ende die laghen der ongoddelijcker sal hy omworpen.

4

Een slappe hant heeft armoede ghemaect, maer die hant vanden stercken bereydt rijckdommen,

5

Die hem verlaet op lueghenen dese voedt die winden, ende die selue volcht oock die vlieghende voghelen, Die inden oochst vergadert dats een wijs sone, maer die inden somer vast slaept dats een kint der scanden.

6

Die benedictie des Heeren is opt hooft vanden rechtuerdighen, maer den mont der ongoddelijcker bedect die boosheyt.

7

⁺Die ghedenckenisse vanden rechtuerdighen is met loffelijcheden, ende den naem der ongoddelijcker sal verrotten.

+ B

8

Die wijs van herten is sal die gheboden ontfanghen, een dwaes wort metten lippen gheslaghen.

9

Die simpelijc wandelt die wandelt sekerlijc maer die sijn weghen verkeert sal openbaer worden.

10

Die metter ooghen winct sal smerte gheuen, ende een dwaes sal metten lippen gheslaghen worden,

11

Den mont vanden rechtuerdighen is een adere des leuens ende den mont der boosen bedect die boosheyt.

12

Haet verwect kijuagien, ende alle die misdaden ouerdect die liefde.

13

In die lippen vanden wijsen wort wijsheyt gheuonden, ende een roede op sijnen rugghe die ghebreck van herten lijdt.

14

Die wijse verborghen die wetenheyt maer den mont vanden dwasen is der scandelijcheyt nae by.

15

⁺Eens rijcks mans goet, is die stadt sijnder stercheyt, die vreese der armer is hen armoede.

+ C

16

Het werck vanden rechtuerdighen totten leuen, maer die vrucht vanden ongoddelijcken totter sonden,

17

Eenen wech des leuens is den ghenen die de onderwijsinghe bewaert, maer wie straffinghen verlaet die doelt.

18

Die loghenachtighe lippen verberghen den hate, wie blameringhe voortbrengt die is onwijs.

19

In veel sprekens en sal gheen sonde ghebreken, maer die sijn lippen regeert is dalder voorsienichste.

20

Ghecoert siluer is die tonghe van eenen rechtuerdighen, maer therte vanden ongoddelijcken is voor niet,

21

Die lippen vanden rechtuerdighen leeren der seer vele, maer die ongheleert sijn sullen in ghebreckelijcheyt des herten steruen,

22

Die benedictie des Heeren maect rijcke ende met hen en sal gheen pijnlijcheyt gheuoecht worden.

23

Als door lachernie bedrijft een dwaes groot quaet, maer die voorsichticheyt is eenen man wijsheyt,

24

⁺Wat die ongoddelijcke vreest dat sal hem ouercomen, den rechtuerdighen sal hen begheerte ghegheuen worden.

+ D

25

Ghelijc een oueruarende onweder, soo en sal die ongoddelijcke niet wesen, maer die rechtuerdighe sal sijn als een eewich fundament.

26

Ghelijck edick is den tanden, ende rooc den ooghen, alsoo is een traech mensch den ghenen die hem ghesonden hebben.

27

Die vreese des Heeren verlingt die daghen, ende die iaren der ongoddelijcker sullen ghecort worden,

28

Dat verbeyden der rechtuerdigher is blijscap, maer die hope der ongoddelijcker sal verghaen.

29

Die stercheyt vanden simpelen is den wech des Heeren ende vreese den ghenen die quaet doen.

30

Die rechtuerdige en sal inder eewicheyt niet beroert worden, maer die ongoddelijcke en sullen op deerde niet woonen,

31

Den mont vanden rechtuerdighen sal wijsheyt baren, die tonghe vanden verkeerden sal vergaen.

32

Die lippen vanden rechtuerdighen aenmercken behaghelijcke dinghen, ende den mont der ongoddelijcker verkeerde dinghen.