Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .ix. Capittel.

[p. *497]

1

⁺DIe wijsheyt heeft voor haer een huys ghetimmert, ende wtghehouwen seuen columnen

+ A

2

Sij heeft haer slachofferanden ten offer ghedoot, wijn ghemenghet ende haer tafel voort ghestelt,

3

Sij heeft haer dienstvrouwen wtghesonden dat sij roepen souden totter borcht, ende tot die vesten der stadt.

4

Soo wie een cleyn kint is die come tot my, Ende tot den onwijsen heeft sij ghesproken.

5

Coemt ende eedt mijn broot, ende drinct den wijn die ick v ghemenghet hebbe,

6

⁺Verlaet die kintscheyt, ende leeft, ende wandelt door die weghen der voorsichticheyt,

+ B

7

Die eenen spotter onderwijst die doet sij seluen onrecht, ende die eenen ongoddelijcken straft die wint sij seluen een smette,

8

En wilt den spotter niet straffen, op dat hi v niet en hate. Straft den wijsen, ende hy sal v liefhebben,

9

Gheeft den wijsen een oorsake, ende hem sal wijsheyt toeghedaen worden. Leert den rechtuerdighen, ende hy sal hem haesten om te ontfanghen,

10

Tbeghinsel der wijsheyt is die vreese des Heeren, ende die kennisse der heylighen is die voorsichticheyt,

11

⁺Want door my sullen v daghen vermenichfuldicht worden, ende v sullen iaren des leuens toegheleyt worden,

+ C

12

Eest dat ghy wijs sijt, soo suldijt v seluen sijn, maer sijdi een bespotter soo suldy alleen tquaet draghen,

13

Die dwase ende roepachtighe vrouwe ende vol aenlockinghen, ende niet met allen wetende,

14

heeft gheseten in die doeren haers huys op eenen setel in een hooghe plaetse vander stadt,

15

⁺om dat sij roepen soude die ouer wech voorby ghinghen, ende reysende haerlieder wech,

+ D

16

Wie isser cleyn kint die wijcke te mywaerts, Ende totten onuerstandighen heeft hy gheseyt.

17

Die ghestolen wateren sijn sueter, ende tverborghen broot is smakelijcker om eten,

18

Ende hy en heeft niet gheweten, dat daer ruesen sijn, ende in die diepte der hellen sijn haer tafelghasten, Want die met haer versaemt wort, sal neder dalen ter hellen waert, Want die van haer wech gaen sal, die sal behouden worden.