Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .vij. Capittel.

1

⁺MYn sone bewaert mijn woorden, ende mijn gheboden verbercht voor v. Sone eert den Heere, ende ghy sult weluaren, maer sonder hem en vreest gheenen vreemden,

+ A

2

Bewaert mijn gheboden ende ghy sult leuen, ende mijn wet als den appel van uwer ooghen,

3

bindtse in v vingheren, scrijftse in die tafelen ws herten,

4

Segt der wijsheyt, ghy sijt mijn suster, ende die voorsichticheyt noemt v vrindinne,

5

dat sij v beware van die buytenvrouwe, ende van die vreemde vrouwe die haer woorden suet maect,

6

Want van die venster mijns huys door die tralien heb ick wtwaerts ghesien,

7

ende ick sie die cleyn kinderen, ic mercke eenen dwasen ionghelinc

8

die voorby gaet ouer die straten by den hoecke ende gaet neffens den wech van haren huyse,

9

⁺int doncker als den dach ten auont waerts ghinc in die duysternissen des nachts, ende int doncker,

+ B

10

Ende siet hem coemt te ghemoete een vrouwe met eender lichter vrouwen cieraet, bereydt om zielen te bedrieghen,

11

snaterachtich ende onghestadich, ongheduerich der rusten, ende niet connende in huys blijuen staende met haeren voeten,

12

nv buyten, nv op die straten, nv neffens die hoecken laghen legghende.

13

Ende den ionghelinck ghegrepen hebbende, cust sij hem, ende met een onscamel aenlockende aensicht smeect sij segghende.

14

Ick heb slachofferanden voor mijn salicheyt gheloeft, heden heb ick mijn beloften betaelt,

15

daerom ben ick wtghegaen v te ghemoete, ⁺begherende v te siene, ende ick heb v vonden.

+ C

16

Ick heb met coordekens mijn beddeken tsamen gheuoecht, ic hebt ouerdect met ghebeelde tapijten wt Egipten,

17

mijn slaepcamer heb ick bespraeyt met myrrhen, ende aloe, ende caneel,

18

coemt laet ons droncken worden van die borsten ende ghebruycken die begheerde omhelsinghen, tot dat den dach claer opghaet,

19

want die man en is in sijn huys niet, hy is wech ghegaen eenen seer verren wech

20

een borse ghelts heeft hy met hem ghedraghen, inden dach der volder manen sal hy wedercomen in sijn huys,

21

Sij heeft hem bestrict met veel redenen, ende met die smeekinghen van haren lippen heeft sij hem voorts ghetrocken.

22

⁺Ter stont soo volcht hy haer als eenen osse ten slach huyse gheleydt, ende ghelijck een weeldich lammeken. Ende die dwaes en weet niet dat hy tot die banden ghetrocken worde,

+ D

23

tot dat den pijl sijn leuere doorschiet, ghelijck oft eenen voghel hem haeste tot den stricke, ende hi en weet niet dat dit tperijkel sijnder zielen aengaet,

24

Daerom nv mijn sone hoort my, ende merct aen die woorden mijns monts,

25

En laet v herte niet afghetrocken worden in haer weghen, noch en laet v niet bedrieghen met haer paden,

26

want sij heefter vele ghewonde ter neder gheworpen, ende veel vanden stercsten sijn van haer ghedoot,

27

Die weghen der hellen sijn haer huys, doorghaende tot dbinnenste der doot.