Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .vi. Capittel.

1

⁺MYn sone eest dat ghy borge worden sijt voor uwen vrint, soo hebdi v hant bi eenen vreemden verbonden,

+ A

2

ghy sijt ghestrickt met die woorden ws monts, ende gheuangen met v eyghen redenen.

3

Daerom doet dat ick v rade mijn sone, ende verlost v seluen, want ghi sijt gheuallen in ws naesten hant, Loopt tallen sijden, haest v, wect uwen vrint,

4

en gheeft uwen ooghen gheenen slaep, noch en laet v wimbrauwen niet sluymeren.

5

Trect v daer wt als een dasken wter hant, ende ghelijck eenen voghel wt des voghelaers hant,

6

Gaet tot die miere o ghy traghe, ende aenmerct haer weghen ende leert wijsheyt,

7

die welcke (daer sij gheenen leydtsman noch ghebieder noch prince en heeft)

8

bereydt inden somer spijse voor haer seluen, ende vergadert inden oochst dat sij ete.

9

⁺Hoe langhe sult ghy traghe slapen? wanneer suldy opstaen van uwen slaep?

+ B

10

Een luttelken suldy slapen, een weynich sluymeren, ende een luttelken v handen tsamen legghen om te slapen,

11

ende die ghebreckelijcheyt sal v comen als een wandelaer, ende die armoede als een ghewapent man. Maer eest dat ghy rasch sijt, soo sal als een fonteyne uwen oochst comen, ende die armoede sal verre van v vlieden,

12

Een afuallende mensch, een onnut man, gaet met eenen verkeerden mont,

13

hy winct metten ooghen, hy wrijft metten voete, metten vingher spreect hy,

14

ende met een verkeert herte leght hi opt quaet toe, ende tot allen tijden saeyt hy kijuagien,

15

desen sal haestelijck sijn verderffenisse ouercomen, ende onuersienlijck sal hy vernielt worden, noch hy en sal voorts gheen medecijne hebben,

16

Ses dinghen sijnder die de Heere hatet, ende tseuenste versmaet sijn ziele.

17

Opghehauen ooghen, een loghenachtighe tonghe, handen stortende onsculdich bloet,

18

⁺een herte dat arbeydt om te volbrenghen seer quade ghedachten, voeten die rasch sijn om te loopen int quaet,

+ C

19

een voortbrenghere der loghenen, een valsch ghetuyghe, ende die tusschen broeders twist saeyt,

20

Bewaert mijn sone die gheboden ws vaders, ende en verlaet ws moeders wet niet,

21

Bint die in v herte altijt, ende doetse om uwen hals.

22

Als ghy wandelt soo laetste met v gaen, als ghi slapet soo laetse v bewaren ende ontspringhende spreect met die, want tghebot is een lichtuat,

23

ende die wet een licht, ende eenen wech des leuens is die straffinghe der onderwijsinghen,

24

op dat sij v bewaren van die quade vrouwe, ende van die smeeckende tonghe der vreemder.

25

V herte en begheere haer schoonheyt niet, dat ghy niet gheuanghen en wort met haren wincken,

26

want die weerde van een oneerbaer vrouwe en is nauwelijcs van eenen broode, maer die vrouwe rooft eens mans costelijcke ziele.

27

⁺Mach een mensch vier in sijnen schoodt verberghen alsoo dat sijn cleederen niet en branden?

+ D

28

oft wandelen op vierighe colen, alsoo dat die planten sijnder voeten niet verbrant en worden?

29

alsoo oock wie dat ingaet tot sijns naesten huysvrouwe, en sal niet suyuer sijn als hy haer ghenaect heeft.

30

Ten is gheen groote misdaet als iemant ghestolen heeft, want hy steelt om dat hy sijn hongherighe ziele soude versaden

31

ende als hy beuonden wort, soo sal

[p. *496]

hijt seuen dobbel weder gheuen, ende alle tgoet van sijnen huyse sal hy ouer leueren,

32

Maer die een ouerspeelder is sal om sijns herten ghebreckelijcheyt sijn ziele verliesen,

33

leelijcheyt ende scande vergadert hy voor sij seluen, ende sijn verwijt en sal niet wtghedaen worden,

34

Want die ialoursheyt ende rasende gramscap des mans en sal niet sparen inden dach der wraken,

35

noch hy en sal niemants bidden verhooren, nocht hy en sal voor die verlossinghe niet ontfanghen seer veel gauen.