Den gheheelen Bybel, Inhoudende het oude ende nieuwe Testament (Leuvense bijbel 1548)

Den .C.xlviij. Psalm.

Laudate Dominum de.

1

LOuet den Heere ghy die vanden hemelen sijt, loeft hem in die hoochden.

2

Loeft hem alle sijn enghelen, loeft hem alle sijn crachten.

3

Loeft hem sonne ende mane, loeft hem alle sterren ende dlicht.

4

Loeft hem ghy hemelen der hemelen, ende die wateren die bouen die hemelen sijn

5

laet louen den naem des Heeren.

Want hy heuet gheseyt, ende si worden ghemaect, hy heuet gheboden, ende sij worden ghescapen.

6

Hy heeft die vast ghestelt in die eewicheyt ende inde eewicheyt der eewicheden, een ghebodt heeft hy ghestelt, ende ten sal niet vergaen.

7

Loeft den Heere ghy die vander eerden sijt, draken ende alle afgronden.

8

Vier, haghel, sneew, ijs, winden der tempeesten, die sijn woort doen.

9

Berghen ende alle hueuelen, vruchtbarighe boomen, ende alle cederboomen.

10

Beesten ende alderhande vee, serpenten, ende gheuederde voghelen.

11

Coninghen der eerden, ende alle volcken, princen, ende alle rechters der eerden.

12

Ionghelinghen, ende maechden, oude luyden metten ionghen, laet den naem des Heeren louen,

13

want sijnen naem alleen is verhauen.

14

Sijn belijdinghe is bouen hemel ende eerde, ende hy heeft verhauen den horn sijns volcs.

Loffsanck sij alle sijnen heylighen, den kinderen van Israel, den volcke dat hem ghenaket, Alleluya.